मध्यराति हात्तीको आक्रमणबाट एक जना मृत्यु 

---

नयाँ पेज

२०८१ माघ ५ शनिबार १४:३४ बजे

मोरङ । मोरङको सुन्दरहरैंचामा जंगली हात्तीको आक्रमणबाट एक जनाको मृत्यु भएको छ । शुक्रबार राति छावासहित बस्ती पसेको हात्तीको आक्रमणबाट सुन्दरहरैंचा नगरपालिका–८ का ७१ वर्षका हरिप्रसाद घिमिरेको मृत्यु भएको हो ।

जिल्ला प्रहरी कार्यालय मोरङका अनुसार मध्यरातमा हात्ती आएर घरमा उपद्रो मच्चाउन थालेपछि भाग्न खोज्दा आक्रमणमा परी घिमिरेको मृत्यु भएको हो । बच्चासहित आएको माउ हात्तीको आक्रमणबाट घिमिरेको घटनास्थलमै ज्यान गएको थियो ।

यसअघि गत पुस १५ गते पनि सुन्दरहरैँचा नगरपालिका–५ स्थित नमुना सामुदायिक वनमा स्थानीय गुरुङ टोल बस्ने ६० वर्षीया चन्द्रकुमारी लिम्बूको हात्तीको आक्रमणबाट मृत्यु भएको हो । पछिल्लो समय सुन्दरहरैँचा आसपासको क्षेत्रमा जंगली हात्तीको आतंकबाट स्थानीय आजित छन् ।