.gif)
.png)
तत्काल रूसी युद्ध अपराध पुष्टि गर्न असम्भव : संयुक्त राष्ट्रसङ्घ
काठमाडौं । संयुक्त राष्ट्रसङ्घीय युक्रेनी आयोगले रुसी सेनाद्वारा मानव अधिकार हननका अनेक आरोप प्राप्त भएको तर ती युद्ध अपराध हुन् वा होइनन् हतारमा निष्कर्षमा पुग्न नहुने बताएको छ ।
आयोगका अध्यक्ष एरिक मोसेले कीभमा आयोजित पत्रकार सम्मेलनमा भने, ‘बुचा र इर्पिनमा आयोगले आम नागरिकको अन्धाधुन्ध हत्या, सम्पत्तिको विनाश र लुटपाटका साथै विद्यालयलगायतका पूर्वाधारमा आक्रमण भएको जानकारी प्राप्त भएको छ ।’
उनले भने, ‘खारकिभ र सुमी क्षेत्रका ठूला सहरी केन्द्रको विनाशको अवलोकन गरेको छ । अध्ययनले हवाई आक्रमण, आम नागरिकविरुद्धका आक्रमण वा क्षेप्यास्त्र हमला भएका भन्ने बलिया आधारहरू भेटाएको छ ।’ तर मोशाले मार्चमा कीभ नजिकै घटेका घटनाहरूको पूणर् कानुनी आधार प्रदान गर्ने स्थितिमा संयुक्त राष्ट्रसङ्घ अहिले नभएको उनले बताए ।
उनले भने, ‘आयोगले सङ्कलन गरेको प्रमाणहरू युद्ध अपराध र मानवताविरुद्ध अपराधसहित मानव अधिकार उल्लङ्घनका आरोप पुष्टि गर्नसक्ने आधार बन्न सक्छन् ।’ बुचा, इर्पिन, खार्किभ र सुमिको भ्रमणका क्रममा आयोगले नागरिकबाट साक्षी बयान सङ्कलन गर्नुका साथै स्थानीय अधिकारी तथा नागरिक समाजका सङ्गठनहरूसँग पनि भेटघाट गरेको थियो ।
आयोगका सदस्य पाब्लो डे ग्रिफले भने, ‘उदाहरणका लागि आम विनाशको साक्षी दिनु वा जानाजानी हत्याको विवरण प्राप्त गर्नु एउटा कुरा हो, तर यी तथ्यहरूको कानुनी आधारसहित निणर्यमा आउनु अर्कै कुरा हो ।’ युक्रेनमा फेब्रुअरी र मार्चमा भएका घटनाहरूको जाँच गर्ने जिम्मेवारी पाएको आयोग आगामी महिना आफ्नो कामलाई निरन्तरता दिन स्वदेश फर्कने छ ।
संयुक्त राष्ट्रसङ्घको अनुगमन युक्रेनमा सम्भावित युद्ध अपराधको विभिन्न अन्तर्राष्ट्रिय अनुगमनमध्ये एक हो। यसमा अपराध मामिला हेर्ने अन्तरराष्ट्रिय अदालत (आईसीसी) द्वारा खोलिएको एउटा जाँच पनि समावेश छ जसको अभियोजनकर्ता करीम खान हालै खारकिभ गएका थिए ।
युक्रेनका महाधिवेशन जनरल इरिना भेनेडिक्टोभाले बुधबार भने, ‘वकिल खानले अपराध स्थलको सावधानीपूर्वक अनुगमन तथा जानकारी सङ्कलन गर्दै छन् र हाम्रा अभियोजनकर्तालाई महत्वपूणर् प्रश्नहरू सोधिरहनु भएको छ ।’ खानले खारकिभ छिमेकमा रहेको एक बस्तीमा भ्रमण गरी एकै स्थानमा केटाकेटीसहित नौ जना सर्वसाधारणको मृत्यु हुने गरी भएको आक्रमणबारे अनुसन्धान गरिरहेको बताइएको छ ।
उक्त आक्रमणमा पाँच महिने बालकसहित मे २६ मा भएको बम विस्फोटनमा घाइते भएका अन्य १७ जनाबारे पनि अनुसन्धान भइरहेको छ । रासस/एएफपी
