एनपीएलमा आज विश्राम : लुम्बिनी शीर्ष स्थानमा

---

नयाँ पेज

२०८३ कार्तिक १८ बुधबार ०८:२६ बजे

काठमाडौं : नेपाल प्रिमियर लिग (एनपीएल) को तेस्रो संस्करणमा आज कुनै खेल हुने छैन । सहभागी टोलीलाई विश्राम दिन प्रतियोगिताको आजको दिन ‘रेस्ट डे’ का रूपमा राखिएको हो ।

मंगलबार पोखरा एभेन्जर्सलाई आठ विकेटले पराजित गरेपछि लुम्बिनी लायन्स अंकतालिकाको शीर्ष स्थानमा उक्लिएको छ । त्रिवि क्रिकेट रंगशाला कीर्तिपुरमा पोखराले दिएको ९८ रनको लक्ष्य लुम्बिनीले ११.४ ओभरमा दुई विकेट गुमाएर पूरा गरेको थियो ।

जितसँगै लुम्बिनीले तीन खेलबाट पाँच अंक जोडेको छ । लुम्बिनीले दुई खेल जितेको छ भने एक खेल वर्षाका कारण रद्द भएको थियो ।

लुम्बिनीको जितमा कप्तान रोहितकुमार पौडेलले अविजित ४७ र निरोश डिक्वेलाले अविजित २७ रन बनाए । यी दुईले तेस्रो विकेटका लागि अविजित ७७ रनको साझेदारी गर्दै टोलीलाई सहज जित दिलाए ।

पोखरा भने प्रतियोगितामा लगातार तेस्रो हार व्यहोर्दै अंकविहीन छ । यसअघि पोखरा सुदूरपश्चिम रोयल्ससँग ६ विकेट र जनकपुर बोल्ट्ससँग नौ रनले पराजित भएको थियो। तीन खेलबाट अंक जोड्न नसकेको पोखरा अंकतालिकाको पुछारमा छ ।

हेर्नूहोस् हालसम्म कुन टिमलाई कति अंक ?