.gif)
 (1).png){kind=logo}
.png)
प्रधानमन्त्रीको चीन भ्रमणअघि राष्ट्रियताको सवालमा साझा धारणा बनाऔं : रास्वपा
.jpg)
काठमाडौँ । राष्ट्रिय स्वतन्त्र पार्टी (रास्वपा) का सांसद गणेश पराजुलीले प्रधानमन्त्री केपी शर्मा ओलीले चीन भ्रमणभन्दा अगाडि सदनबाट राष्ट्रियताको सन्दर्भमा साझा अवधारणा बनाउन माग गरेका छन् ।
प्रतिनिधिसभाको आज (शुक्रबार) को बैठकमा आकस्मिक समयमा बोल्दै सांसद पराजुलीले सन् १८१६ को सुगौली सन्धिबाट नै नेपालको पश्चिमी सीमा काली नदी ठहरिएको ऐतिहासिक तथ्य कुनै विवादको विषय बन्न नसक्ने बताए ।
‘लन्डनको ब्रिटिस लाइब्रेरीमा रहेको कार्टोग्राफिक एभिडेन्स अर्थात् १८२७ मा प्रकाशित सर्वे अफ इन्डियाको पहिलो ब्रिटिस नक्सा होस् या १८५६, १८७९ र १९०४ मा छापिएका अन्य नक्साहरू,’ पराजुलीले भने, ‘सबैले स्पष्ट देखाएका छन् काली नदीको उदगम लिम्पियाधुरा हो र यही नदी नेपालको पश्चिमी सीमा हो । यो दस्ताबेजलाई इतिहासले अमिट बनाइसकेको छ ।’
उनले भूगोल र हाइड्रोलोजिकल प्रमाणका तथ्य केलाउँदा नदी नालाका प्रवाह, भू–आकृति संरचना, स्थानीय बस्ती र प्राकृतिक भूगोलको प्रमाणहरू अनि सन् १९६१ को जनगणना, त्यतिबेलाका प्रशासनिक अभिलेख तथा सन् १९५९ को आम निर्वाचनको मतदाता नामावली लिम्पियाधुरा नेपालको आफ्नो भूभाग हो भनेर प्रमाणित गर्न पर्याप्त रहेको बताएका छन् ।
नेपालको भू–भाग माथि अन्य राष्ट्रहरूले नेपालको प्रत्यक्ष सहभागिता र सहमति बिना गर्ने कुनै सम्झौता वा गतिविधि वैधानिक नहुने र हुन नसक्ने उनले बताए । भारत र चीनबिच नेपाललाई सहभागी नगराई लिपुलेक मार्ग प्रयोग गर्न गरिएको समझदारी अन्तर्राष्ट्रिय कानुनको दृष्टिले अवैध भएको पराजुलीले बताए ।
विगत एक हप्तादेखि माइतीघर मण्डलामा आन्दोलनमा रहेका उखु किसानसँग सरकारले यथाशीघ्र वार्ता गरेर फेरि कहिल्यै आन्दोलन गर्नुपर्ने नगरी सम्बोधन गर्नको लागि आग्रह गरे ।
