.gif)
 (1).png){kind=logo}
.png)
मुलुकको आजको छटपटी नयाँ इतिहासको पीडा : घनश्याम भुसाल
‘मुलुकको अवस्था सर्पले काँचुली फेर्दै गरेको जस्तो हो’
.jpg)
काठमाडौँ । नेकपा एकीकृत समाजवादीका महासचिव घनश्याम भुसालले अहिलेको मुलुकको राजनीतिक अवस्था सर्पले काँचुली फेर्दै गरेको अवस्था जस्तै भएको टिप्पणी गरेका छन् ।
वर्तमान राजनीतिक संकट र निकासबारे शहीद बेपत्ता स्मृति प्रतिष्ठानले बिहीबार बुटवलमा गरेको बहस कार्यक्रममा बोल्दै महासचिव भुसालले भने, ‘अहिलेको अवस्था भनेको सर्पले काँचुली फेर्दै गरेको अवस्था जस्तै हो, आजको छटपटी नयाँ इतिहासको पीडा हो ।’
उनले समाजमा रहेको उकुसमुकुस तीव्र रूपमा बढिरहेको पनि बताएका छन् । ‘यो यति बढेको छ कि यसले विभिन्न ठाउँमा विभिन्न हिसाबले प्रतिक्रियाहरू उत्पन्न गरेको छ।’ उनले कम्युनिष्ट आन्दोलन विघटनबाट देशभर र बाहिरका शुभचिन्तकहरूलाई पनि चिन्तित तुल्याएको दावी गरेका छन् । उनले मुलुकबाट पञ्चायत, राजतन्त्र गए पनि पार्टीहरूको ढाँचा नबदलिँदा दलाल पुँजीवाद पनि कायमै रहेको बताए ।
उनले अहिलेको आवश्यकता वामपन्थी कम्युनिष्टहरू ध्रुवीकरण जरुरी रहेको भन्दै अहिले आफूहरूले नगरे अरू कसैले भए पनि निरन्तर प्रयास गरेर ध्रुवीकृत र कम्युनिष्ट एकीकृत भइछाड्ने दाबी गरे । ‘आन्दोलन ध्रुवीकृत गर्न सक्छौँ । आज जुन परिस्थिति छ यसो हेर्दा आज मात्र निस्किएको परिस्थिति होइन, धेरै अघिदेखि देखिएको अन्तर्विरोध हो’, उनले भने, ‘अब यो समाजले थेग्दैन भनेर समाजले बुझिसकेको तर नयाँ नबनिसकेको अवस्था पनि छ ।’
एमाले, माओवादी वा एकीकृत समाजवादीका नक्कली सीमा भत्काउनु पर्ने र अगाडिको भविष्य छेक्न नहुने भुसालको भनाइ छ । त्यसका लागि त्यो सीमा भत्काउन अहिलेबाटै छलफल गर्नुपर्नेमा भुसालले जोड दिए ।
