.gif)
 (1).png){kind=logo}
.png)
पूर्वराजाको क्यारिकेचर गरेका प्रभातलाई धम्की
काठमाडौं । हाँस्य कलाकार प्रभात लामालाई धम्की आएको छ । कमेडी नाइट्स विथ च्याम्पियन्सको एक एपिसोडमा पूर्वराजा ज्ञानेन्द्र शाहको क्यारिकेचर गरेका लामालाई राजावादीले धम्की दिएका हुन् । फोन गरेर राजावादीले उनलाई गाली गर्नुका साथै धम्की दएका उनको भनाइ छ ।
उनले भनेका छन्, ‘कमेडी नाइट विथ च्याम्पियन’ को पछिल्लो अंकमा मैले पूर्व राजा ज्ञानेन्द्रको क्यारिकेचर पछि केही साथीहरु रिसाएर म्यासेज फोन गरिराख्नु भएको छ । म हालको गणतान्त्रीक मुलुकको स्वतन्त्र नागरिकको हैसियतले महामहिम राष्ट्रपति र सम्माननीय प्रधनमन्त्री ज्यूको पनि गलत कार्यको व्यंग्य र प्रश्न उठाउने अधिकार राख्न सक्छु भने पूर्वराजाको क्यारिकेचर गर्दा गलत के भयो ? तपाईंको राजा नआउदै यस्तो रवाफ देखाउनु हुन्छ भने साँच्चै राजा आएको दिन के गर्नु हुन्छ ? मलाई मेरो काम गर्न दिनुस् तपाई तपाईको राजा ल्याउदै गर्नुस् ।’
‘कुनै पनि शैलीको धाक धम्कीको भाषा प्रयोग नगरिदिनुहोला । कार्यक्रम केवल मनोरञ्जनको लागि तयार पारिएको हो’ प्रभातले लेखेका छन्, ‘राजनीतिक अभिष्ट पुरा गर्न, कसैलाई सकाउन वा बनाउन तयार पारिएको कार्यक्रम होइन । हेरेर मज्जाले हाँस्नुहोला । सुझाव चाहिँ दिँदै गर्नुहोला ।’ ‘राजसंस्थालाई सम्मान गर्न सिक्’ भनेर समेत थर्काएको उनले बताए । लामाले भने, ‘मेरो राजसंस्थाप्रति कुनै दुश्मनी छैन । म राजनीति गर्नलाई कमेडीको स्टेजमा गएको पनि होइन । मैले कलाको सम्मान गर्ने हो । अनेक परिस्थितिमा गणतन्त्रकै सन्दर्भमा पनि मैले व्यंग्यात्मक प्रस्तुति दिएको छु ।’
फोन कलको अलवा म्यासेजहरु टन्नै आइरहेको, कमेन्टहरुमा समेत आफूलाई गालीगलैज गरिरहेको उनले बताए । उनले भने, ‘गेस्टको रुपमा राजावादीहरु ज्ञानेन्द्र शाही, खुश्बु ओली र स्वागत नेपाल आउनु भएपछि पूर्वराजाको क्यारिकेचर गरेको थिएँ । कमेडीमा लुक्सले पनि महत्व त राख्छ, तर लुक्सभन्दा मेजर कुरा विषयवस्तु हो । यही कारण पूर्वराजाको क्यारिकेचर गर्ने आँट गरेको थिएँ । मैले कलाकारको रुपमा क्यारिकेचर गरेको हुँ । मेरो जातलाई नै जोडेर गाली नगरिदिनु भएको भए हुन्थ्यो । ’
कमेडी नाइटस् विथ च्याम्पियनको १३ औं एपिसोडमा लामाले पूर्वराजाको क्यारिकेचर गरेका थिए । उनको प्रस्तुति औसत थियो । यसअघि उनले निर्वाह गरेको पूर्वमन्त्री अफताव आलमको पात्रले चर्चा र प्रशंसा पाएको थियो । त्यसको तुलनामा पूर्वराजाको क्यारिकेचर भने ‘ह्यूमरस’ हुन सकेन । यो एपिसोडका अन्य प्रस्तुतिहरु भने निकै मन पराइएका छन् ।
