.gif)
 (1).png){kind=logo}
.png)
बजेटप्रति प्रतिपक्ष भन्दा पनि बढी असन्तुष्ट सत्ता पक्षका सांसदहरु छन् : सांसद शाही
काठमाडौं । सांसदहरूले निर्वाचन प्रणाली बदलेर नयाँस्वरूपमा जानुपर्नेमा जोड दिएका छन्। प्रतिनिधिसभाको आजको बैठकमा विनियोजन विधेयक, २०८२ का विभिन्न शीर्षकमाथि जारी छलफलअन्तर्गत आज तोकिएका विषयका बारेमा विचार राख्दै नेकपा माओवादी केन्द्रका सांसद महेन्द्र शाहीले निर्वाचन प्रणालीकै कारण सुशासनमा समस्या भएकोलगायत विकृतिका बारेमा चर्चा हुने गरेकाले यसलाई बदल्नुपर्ने बताए । वार्षिक पुँजी वृद्धि कसरी गर्न सकिन्छ भन्नेतिर ध्यान नगएको, जम्मा भएको राजस्व बाँड्ने मात्र अर्थमन्त्रीको काम हो कि जस्तो भान पार्न नहुने पनि उनले सुनाए।
सांसद शाहीले सही बजेट विनियोजन हुन निर्वाचन प्रणाली बदल्नु पर्ने बताएका छन्। ‘यो निर्वाचन प्रणाली नै बदलौँ, निर्वाचन प्रणाली नबदलीकन बजेट बदलिँदैन,’ शाहीले भने, ‘यो परम्परागत भइरहन्छ । किनभने यो बजेट बनाउने दबाब त्यही हो। सरकारलाई आउने दबाब भनेकै निर्वाचन प्रणालीकै दबाब हो। चुनावमा जाँदा सांसदहरुले विद्यालय बनाउँछु, सडक बनाउँछु, शिक्षा, स्वास्थ्य लगायतका पूर्वाधार विकास, गरिबीको अन्त्य गर्ने, रोजगारी सिर्जना गर्ने विकास निर्माणका तमाम विषयहरु पूरा गर्छौं भनेर जनताबाट निर्वाचित भएर आएका सांसद हुन्। बजेटप्रति प्रतिपक्ष भन्दा पनि बढी असन्तुष्टि सत्ता पक्षका सांसदहरु छन्।’
सांसद प्रकाश ज्वालाले सहरी विकास मन्त्रालयलाई विचौलियाको कमाइ खाने भाँडो बनाइएको बताए । गणेशमान सिंहका नाममा ५७ करोड बजेट छुट्याएर अपमान गर्न खोजिएको उनले बताए । पुष्पलालका नाममा ७० लाख बजेट दिइएको पनि सांसद ज्वालाले बताउँँदै यस्ता विनियोजनले जनताको करको दुरुपयोग भएको भनाइ राखे । कर्णाली प्रदेशमा राष्ट्रिय खेलकुद प्रतियोगिता गर्ने भनी संरचना बनाइए पनि हुन नसकेको उनले सुनाए।
प्रविधिमैत्री कानुन नबनाए विकास निर्माणका काम अघि बढ्न नसक्ने सांसद ज्वालाको भनाइ थियो। सांसदद्वय रञ्जुकुमारी झा र अब्दुल खानले उपराष्ट्रपतिलाई राष्ट्रियसभाको अध्यक्ष जिम्मेवारी दिनुपर्ने, विभिन्न निकायमा नियुक्त गरिने सल्लाहकारको संख्या घटाइनुपर्ने, युवा नीतिमार्फत युवालाई उद्यममा जोड्नुपर्ने, पठाओ, इनड्राइभ, यङ्गुलगायतले युवालाई रोजगारी दिएकाले यसलाई कानुनी रुपमा व्यवस्थित गरिनुपर्ने, युवा विकास निर्माण आर्मी गठन गर्नुपर्नेमा उनीहरूले जोड दिए।
