.gif)
 (1).png){kind=logo}
.png)
भिजिट भिसाबारे गगन थापा : छानविनको दायरामा गृहमन्त्री पुगे जिम्मेवारीबाट अलग हुनुपर्छ
काठमाडौं । भिजिट भिसा प्रकरणबारे सत्ता साझेदार नेपाली कांग्रेसका महामन्त्री गगन थापाले अनुसन्धानमा अलमल नगर्न अख्तियार दुरुपयोग अनुसन्धान आयोगलाई आग्रह गरेका छन् । धरानमा भएको पार्टीको एक कार्यक्रमलाई सम्बोधन गर्दै उनले यस्तो बताएका हुन् ।
‘भिजिट भिसा प्रकरणमा अनुसन्धानमा कुनै अलमल नहोस्, यो संगठित जालो र अपराधमा संलग्न देखिएका दोषी दण्डित हुनुपर्छ’, उनले भने, ‘यससँगै भिजिट भिसाको नाममा हुने गरेको ठगीको धन्दा र यसको नेक्सस सधैंलाई बन्द गर्न तथा यो नाममा आम नागरिकले भोग्नुपरेको सास्ती र शोषणको अन्त्य गर्न कानुनी र प्रशासननिक सुधार तत्काल गर्नु आवश्यक छ ।’
उनले भिजिट भिसाका नाममा सयौं नेपाली नागरिक ठगिएको र शोषणमा परेको सार्वजनिक भइरहेका बेला यो कुन हदसम्म विकराल रहेछ र यसको जालो कहाँसम्म फैलिएको रहेछ भन्ने देखिएको बताए । ‘अख्तियार दुरुपयोग अनुसन्धान आयोगले यस प्रकरणमा त्रिभुवन विमानस्थल अध्यागमन कार्यालय प्रमुख लगायतमा अनुसन्धान थालेको छ । कुनै शक्तिको भक्ति नगरी निर्भीक भएर तथा भिडको दबाव वा प्रभावमा नपरी निष्पक्ष ढङ्गले अख्तियारले अनुसन्धानलाई अगाडि बढाउनु पर्छ । कुनै अलमलमा नपरिकन यसको गहिराइसम्म पुग्नुपर्छ । जो जो परोस् जहाँ सम्म पुगोस् यसका जरा, हाँगा बिंगा सबै खोज्नु पर्छ’, उनको भनाइ थियो ।
गृहमन्त्री रमेश लेखकको नाम पनि जोडेर चर्चा परिचर्चा भइरहेको छ । यसरी नाम जोडिएर चर्चा भइसकेपछि पदमा रहिरहन मिल्छ कि मिल्दैन ? अनेकन कोणबाट बहस भइरहेको हुँदा त्यसको अनुसन्धान र अभियोजन गर्ने जिम्मा संविधानले नै अख्तियार दुरुपयोग अनुसन्धान आयोगलाई दिएको बताउँदै त्यसैले हरेक वर्ष अनेकन विषयमा हजारौंको संख्यामा अधिकारीहरू माथि अनुसन्धान भइरहेको हुन्छ तीमध्ये कसैलाई अभियोजन हुन्छ कसैलाई हुँदैन, यो नियमित प्रक्रिया भएकाले यसमा सबैले सहयोग पुर्याउनु पर्ने बताए ।
‘वर्तमान सरकारकै पनि दर्जनौ मन्त्रालयका सयौं अधिकारी माथि अहिले अनुसन्धान भइरहेको छ, जुन निकाय वा जो माथि अनुसन्धान भइरहेको छ सम्बन्धित विषयसँग उनीहरु नै जोडिन्छ’, उनले भने, ‘अनुसन्धानका क्रममा नयाँ तथ्य र प्रमाणहरू प्राप्त भए भने, अनुसन्धानको दायरामा अन्य जिम्मेवार प्रशासनिक वा राजनीतिक अधिकारीहरू थपिंदै जान्छन् ।’
