भन्सार विधेयक १९ महिनापछि प्रतिनिधि सभाबाट पारित

---

नयाँ पेज

२०८२ बैशाख १७ मंगलबार २२:०८ बजे

काठमाडौं । भन्सारसम्बन्धी कानुनलाई संशोधन र एकीकरण गर्न बिनेको विधेयक प्रतिनिधि सभाबाट पारित भएको छ। भन्सार विधेयक संसद्‍मा दर्ता भएको १९ महिनापछि प्रतिनिधि सभाबाट मंगलबार बहुमतले पारित भएको हो । नेपाल मजदूर किसान पार्टीका सांसद प्रेम सुवाल भने विधेयकको विपक्षमा उभिए।

२०८० असोज १८ गते तत्कालीन अर्थमन्त्री डा. प्रकाशशरण महतले संसद्‍मा दर्ता गराएको विधेयक अर्थ समितिले दफाबार छलफल गरेर चैत १९ गते पारित गरी वैशाख १४ गते प्रतिनिधि सभामा पेस गरेको थियो । समितिको प्रतिवेदनमाथि छलफलमा भाग लिएका सांसदहरुले भन्सार विन्दुमा विद्यमान बेथिति रोकथाम गर्नुपर्नेमा जोड दिए । उनीहरुले भन्सार प्रशासनलाई स्रोतसाधन सम्पन्न बनाइ चुहावट रोक्नुपर्ने र व्यवसायीलाई अनावश्यक झन्झट दिन बन्द गर्नुपर्ने बताए । अर्थमन्त्री विष्णु पौडेलले विधेयक कानुनी मान्यता पाएर कार्यान्वयनमा आएपछि भन्सार प्रशासनमा गुणात्मक सुधार हुने विश्वास व्यक्त गरे ।