माओवादी केन्द्रले तराई–मधेसमा जागरण अभियान चलाउने

---

नयाँ पेज

१२:४८ बजे

काठमाडौं । प्रमुख प्रतिपक्षी नेकपा (माओवादी केन्द्र) ले फागुन १ गतेदेखि एक महिना तराई-मधेस जागरण अभियान चलाउने भएको छ । आइतबार बसेको पार्टीको केन्द्रीय कमिटीको बैठकमा अध्यक्ष पुष्पकमल दाहाल ‘प्रचण्ड’ ले एक महिने तराई-मधेस जागरण अभियान चलाउने जानकारी गराए । 

बैठकबारे जानकारी दिँदै पार्टीका प्रवक्ता अग्निप्रसाद सापकोटाले हुलाकी राजमार्गलाई आधारित बनाएर अभियान सञ्चालन गर्ने र अर्को एक महिना पूर्व–पश्चिम राजमार्गलाई आधारित बनाएर गर्ने प्रस्ताव राखेको जानकारी दिए । साथै उपत्यका विशेष अभियान चलाउने धारणा राखेको पनि बताए । केन्द्रीय कमिटी बैठकमा पार्टी एकता र बृहत् वामपन्थी एकीकरणका लागि समाजवादी मोर्चालाई सक्रिय बनाउने, वैज्ञानिक समाजवादलाई मान्नेहरूसित एकताका लागि पहल गर्ने प्रस्ताव आएको पनि बताए ।

उनले भने, ‘पार्टी एकता र बृहत् वामपन्थी एकीकरणको सवालमा अब अहिले मोर्चा छ, त्यो मोर्चालाई सक्रिय गराउने कुरा त भइहाल्यो । त्यसका साथसाथै वैज्ञानिक समाजवादलाई मान्नेहरूसित एकताका लागि पहल गर्ने । नेकपा विप्लव, नेकपा बहुमत, एकीकृत समाजवादी, नेपाल समाजवादी पार्टी, नेपाल आम पार्टीसँग पनि एकताका लागि पहल गर्ने कुरा भएको छ ।’ उनले महिला, दलित र मुस्लिमलाई विशेष अधिकार दिने कुरा पहिला पनि गरेको भन्दै महिलाको अधिकार ३३ प्रतिशतबाट बढाएर ५० पुर्‍याउन पहल गर्ने बताएका छन् ।