बाजुरामा आठ बर्षीया बालिकाको हत्या

---

नयाँ पेज

२०८१ मङ्सिर २९ शनिबार १५:४२ बजे

बाजुरा । बाजुरामा एक आठ बर्षकी बालिकाको हत्या भएको छ । जिल्लाको बुढीगंगा नगरपालिका–२ नडाङमा अन्दाजी आठ बर्षीया विनिता नेपालीको हत्या भएको हो ।

मानसिक सन्तुलन ठीक नभएका सोही गाउँका अन्दाजी ४८ बर्षका नन्दे सनइले बालिकाको धारिलो हतियार प्रहार गरी हत्या गरेको प्रहरीले जनाएको छ । शुक्रवार साँझ सनइले बालिकाको घाँटी काटी हत्या गरेर टाउको साथमा लिएर आफ्नै घरमा रहेको सूचनाका आधारमा प्रहरीले नियन्त्रणमा लिएको छ ।

त्यस्तै आरोपित व्यक्तिबाट एक थान हसिया, एक थान बञ्चरो र एक कोदालो बरामद गरिएको जिल्ला प्रहरी कार्यालय बाजुराले जनाएको छ । बालिकाको शव हिजो राति नै ल्याएर जिल्ला अस्पतालमा राखिएको र घटनावारे थप अनुसन्धान भइरहेको प्रहरीले जनाएको छ ।