.gif)
 (1).png){kind=logo}
.png)
नेपाल र बङ्गलादेशबीचको फाइनल खेल : पहिलो हाफ गोलरहित बराबरी
काठमाडौं । दक्षिण एसियाली फुटबल (साफ) महिला च्याम्पियनसिप अन्तर्गत नेपाल र बङ्गलादेशबीचको फाइनल खेलको पहिलो हाफ गोलरहित बराबरीमा सकिएको छ ।नेपालले विभिन्न समयमा पाएको अवसरलाई सदुपयोग गर्न असफल भएको छ ।
खेलको पहिलो हाफको १० मिनेटमा नेपालकी अनुशा कार्कीले गरेको उत्कृष्ट प्रहार गोल पोस्टको माथिल्लो बारमा लागेर बाहिरिएको थियो । खेलको २४ औं मिनेटमा बङ्गलादेशको प्रहार नेपालकी गोल किपर अञ्जली तुम्बापो सुब्बाले बचाइन् । त्यस्तै खेलको २९औं मिनेट सावित्रा भण्डारी (साम्बा) ले दिएको सुन्दर पासलाई अमिशा कार्कीले गोल गर्नबाट चुकिन् । खेलको ४१ औं मिनेटमा बङ्गलादेशले कर्नर पायो तर नेपाली खेलाडीले त्यसलाई विफल पारिदिए । उक्त कर्नर फाइनल खेलको पहिलो कर्नर हो ।
त्रिपुरेश्वरस्थित दशरथ रङ्गशालामा जारी फाइनल खेल अवलोकन गर्न प्रधानमन्त्री केपी शर्मा ओली, उपप्रधानमन्त्री एवं शहरी विकासमन्त्री प्रकाशमान सिंह, युवा तथा खेलकुदमन्त्री तेजुलाल चौधरी समेत दशरथ रङ्गशाला पुगेका छन् । सन् २०१० मा बङ्गलादेशबाट शुरू भएको साफ महिला च्याम्पियनसिपमा नेपालले अहिलेसम्म उपाधि जित्न सकेको छैन ।
यसअघि पटक–पटक फाइनलसम्म पुगे पनि नेपाल उपविजेतामै चित्त बुझाउन बाध्य बनेको थियो । नेपालले साफ महिला च्याम्पियनसिपमा चार पटक भारतसँग तथा एक पटक बङ्गलादेशसँग फाइनलमा पराजित भएको थियो । नेपाल यो पटक भने घरेलु मैदानमा अघिल्लो सँस्करणमा बङ्गलादेशसँगको हारको बदला लिने दाउमा छ । नेपाल र बङ्गलादेश दुवै अपराजित रहँदै साफको फाइनल पुगेका हुन् । नेपालले भारत र बङ्गलादेशले भुटानलाई हराउँदै प्रतियोगिताको फाइनल यात्रा तय गरेका हुन् ।
नेपालले समूह चरणको खेलमा भुटानसँग गोलरहित बराबरी खेलेको थियो भने माल्दिभ्सलाई ११–० गोलअन्तरले हराएको थियो । त्यसैगरी नेपालले श्रीलंकालाई ६–० गोलअन्तरले पराजित गरेको थियो । यस्तै बङ्गलादेशले समूह चरणको पहिलो खेलमा पाकिस्तानसँग १–१ गोलको बराबरी खेलेको थियो भने दोस्रो खेलमा भारतलाई ३–१ गोलअन्तरले पराजित गरेको थियो ।
