.gif)
.png)
कांग्रेस महामन्त्री गगन थापाको पूर्व सभापतिसँग के भयो कुराकानी ?
काठमाडौं । सत्तारुढ नेपाली कांग्रेसका महामन्त्री गगन थापा र पार्टीका विभिन्न जिल्ला कार्यसमितिका पूर्व सभापतिहरूबीच छलफल भएको छ ।
काठमाडौंमा उपलब्ध कांग्रेसका पूर्व सभापतिहरूसँग शुक्रबार कमलादीस्थित एक होटलमा महामन्त्री थापाले समसामयिक छलफल गरेका हुन् । महामन्त्री गगन थापाले बोलाएको भेलामा पूर्व सभापतिहरूले प्रधानमन्त्री केपी शर्मा ओलीले सहजै सत्ता हस्तान्तरण गर्छन् भन्नेमा आशंका व्यक्त गरेका छन् । आज (शुक्रबार) काठमाडौंमा भएको सो भेलामा उनीहरूले यस्तो आशंका व्यक्त गरेको नुवाकोट कांग्रेसका पूर्व सभापति जगदीश्वरनरसिंह केसीले जानकारी दिए ।
कांग्रेसले प्रधानमन्त्री बनाए पनि ओलीले पछि सहयोग नगर्ने हो कि भनेर शंका उत्पन्न भएको केसीले बताए । ‘सरकार परिवर्तनको कुरामा पनि दुई नेताबीच सहमति भयो । यसलाई ल्याप्चे लगाउने बाहेक पार्टीमा छलफल भएर पारित भएन भन्ने गुनासो साथीहरूबाट आयो,’ उनले भने, ‘कांग्रेस सहमतिमा इमान्दार हुन्छ । तर कम्युनिष्टहरू सहजै इमान्दार हुँदैनन् । प्रचण्डले त्यस्तै शैली देखाउनु भयो । यसैले ओलीजीले पनि सहजै सत्ता हस्तान्तरण गर्नु हुँदैन कि भनेर पूर्व सभापतिहरूले आशंका व्यक्त गर्नुभएको छ ।’
महामन्त्री थापाले कांग्रेस र एमाले मिल्नु पर्नाका कारणबारे बताएका थिए । तर ओलीमाथि नेताहरूले गरेको आशंकाबारे भने केही बोलेनन् । उनले समसामयिक राजनीति, नयाँ गठबन्धन तथा भोलिका भावी राजनीतिका विषयमा जानकारी गराएका थिए ।
छलफलमा कांग्रेसका २० जिल्लाका पूर्व सभापति सहभागी थिए । भेलामा लुम्बिनी कांग्रेसका सभापति अमरसिंह पुनले प्रदेश सरकार गठनमा केन्द्रले हस्तक्षेप गरेको भन्दै आपत्ति जनाए । ‘प्रदेशमा कार्यसमिति छ । तर सरकारमा को जाने भन्नेमा केन्द्रको हस्तक्षेप भयो । जुन लक्ष्यले संघीयता बन्यो त्यसको अभ्यास गर्न पार्टीले उपयुक्त ठानेन भन्ने पुनजीको असन्तुष्टि थियो,’ केसीले भने, ‘विधिविहीनताका आधारमा अगाडि बढे पार्टी नै कमजोर बन्नेमा धेरै साथीले कुरा उठाउनु भयो ।’
