सानेपा धर्ना : किन गएनन् शेखर, गगन र धनराजसहितका शीर्ष नेता ?
![](https://nayapage.com/images/newlog1.jpg)
काठमाडौं । आउँदो मंसिर ४ गते हुने प्रतिनिधिसभा निर्वाचनको समानुपातिक सूची एक पक्षीय रुपमा निर्वाचन आयोगमा पेश गरेको भन्दै आन्दोलित नेपाली कांग्रेसका डा. शेखर कोइराला पक्षधर बुधबार केन्द्रीय कार्यालय सानेपामा धर्ना दिएको छ ।
डा. कोइराला नेतृत्वको उक्त समूहले पार्टी कार्यालय सानेपामा मध्यान्ह १२ बजेदेखि धर्ना दिएको हो । तर उक्त धर्नामा कांग्रेसको संस्थापन इतरका शीर्ष नेताहरु सहभागी छैनन् । कांग्रेसबाट समानुपातिकको बन्द सूचीमा अधिकांश संस्थापन पक्षका नेताहरु समेटिएपछि इतर पक्ष आन्दोलित भएको अवस्थामा बुधबारका लागि धर्ना तय भएको थियो ।
धर्नामा डा. शेखर कोइराला, महामन्त्री गगन थापा, उपसभापति धनराज गुरुङ र नेता चन्द्र भण्डारी सहभागी छैनन् । धर्नामा कोइराला समूहका दोस्रो तहका नेताहरु सहभागी छन् । धर्नामा संस्थापनविरुद्ध आक्रोशपूर्ण अभिव्यक्ति दिँदै आएका गुरुराज घिमिरेदेखि जगदिश्वरनरसिंह केसी समेत सहभागी छन् ।
इतर समूहका नेताहरुको नाम थोरै मात्रै समावेश गरिएपछि आफूहरुले कम्तीमा ४० प्रतिशत हिस्सा पाउनुपर्ने उनीहरुको अडान छ । सभापति शेरबहादुर देउवा पक्षले सुरुमा राखिएका इतर समूहका नेताहरुको नाम पनि बन्द सूचीबाट हटाएको बताइएको छ ।
यही सोमबार बसेको शेखर कोइराला नेतृत्वको समूहको बैठकले बुधबार मध्यान्ह १२ बजे पार्टी केन्द्रीय कार्यालय, सानेपामा एक घण्टा धर्ना दिने निणर्य गरेको थियो । यो धर्नापछि बिहीबार बत्तिसपुतलीमा कोइरालाको टिममा रहेका पदाधिकारी /पूर्व पदाधिकारीबीच छलफल हुने भएको छ ।
कोइराला समूहले टिकट वितरण न्यायोचित हुनुपर्ने माग राखेको छ । समानुपातिक बन्दसूची सार्वजनिक भएपछि इतर समूहले आन्दोलित छ । इतर समूहले प्रदेश १ को समानुपातिक सूची पनि सच्याउनुपर्ने अडान राखेको छ ।