.gif)
 (1).png){kind=logo}
.png)
गाउँमा पुगेर मध्यवर्ती क्षेत्रका समस्या बुझ्दै रक्षामन्त्री पोखरेल
२१:३१ बजे
जंगली जनावरले कृषि उत्पादनलाई नष्ट गर्ने, विगार्ने काम गरिरहेको भन्दैं डाँडागाँऊका स्थानीयले मन्त्री पोखरेलसँग गुनासो गरेका थिए । स्थानीय वालविकास स्कुलका प्राचार्य दोर्जे तामाङले निकुञ्ज क्षेत्र आसपासमा जंगली जनावरले खाद्य बाली नष्ट गरेको भन्दैं स्थानीय जनता मर्कामा परेको बताए ।
मध्यवर्ती क्षेत्र व्यवस्थापन समितिका अध्यक्ष स्थानीय दावा लामाले जंगली जनावरबाट खाद्यबालीमा हुने क्षतिबाट जोगाउने काममा स्थायी समाधान नखोजी सरकारले राहत बाँड्ने काममात्रै गरेको भन्दै रोष प्रकट गरे । ‘शिवपूरीमा पर्खाल लगाएर हुन्छ वा कसरी हुन्छ, जंगली जनावरलाई निकुञ्ज क्षेत्र बाहिर निस्किन नदिने उपाय खोजिनुपर्छ, सरकारले कृषकलाई राहत मात्रै बाँड्ने कुरा गर्नुहुँदैंन’ स्थानीय लामाले मन्त्री पोखरेलसँग गुनासो गरे ।
स्थानीय आमा समूहका सदस्य हरिमाया तामाङले निकुञ्ज क्षेत्रमा महिला र बालबच्चालाई विहानै स्कुल कलेज जाँदा असुरक्षाको महसुस गरिरहेको गुनासो गर्नुभयो । सुत्केरी र वालवच्चा विरामी पर्दा उपचार मध्यवर्ती क्षेत्रमा यातायातको समस्या हुने भन्दै आमा समूहका सदस्यहरुले निकुञ्जको सुुरक्षामा रहेको नेपाली सेनालाई एम्वुलेन्स र प्राथमिक उपचारको व्यवस्था गर्न आग्रह गरे ।
स्थानीय जनप्रतिनिधि बुढानिलकण्ठ नगरपालिकाका मेयर उद्धव खरेल, वडा अध्यक्ष विजय तामाङलगायतले निकुञ्जको उपयोग, अधिकार क्षेत्र तथा सम्वृद्धिका निम्ती अपनाउनुपर्ने उपायको सन्दर्भमा सुझाव प्रस्तुत गरेका थिए ।
मन्त्री पोखरेलले जनता र स्थानीय जनप्रतिनिधीका गुनासा र सुझाव सुनेपछि त्यससँग सम्वन्धित निकुञ्ज र नेपाली सेनाका प्रतिनिधिहरुबाट समस्या समाधानका निम्ती राय-सुझाव लिए ।
निकुञ्जका प्रमुख संरक्षण अधिकृत कमलजंग कुँवरले मध्यवर्तीक्षेत्रका स्थानीय जनतालाई उचित क्षतिपूर्तिको व्यवस्था गत वर्षदेखि दिन थालिएको बताउनुभयो । उहाँले अब छिट्टै निकुञ्जको १२९ किलोमिटरमा रहेको पर्खाललाई व्यवस्थित गरी जंगली जनावर जनताको खेतबारी जान नसक्ने स्थिती बनाउन लागिएको बताए । त्यस्तै नेपाली सेनाले डाँडागाउँ जानलाई नेपाली सेनाको स्टाफ कलेजको प्रांगणबाट जानुपर्ने हुँदा त्यस्ले सुरक्षा चुनौती थपिएको र त्यसले स्थानीयवासीलाई हिंडडुल गर्न गाह्रो भएकाले बैकल्पिक मार्गको प्रस्ताव गरेका थिए ।
सरोकारवालाहरुको भनाई सुनेपछि रक्षामन्त्री पोखरेलले निकुञ्ज क्षेत्रको संरक्षणमा आफु प्रतिवद्ध रहेको भन्दैं स्थानीयका समस्या समाधान गर्ने आफु प्रयत्नरत रहेको बताए । उनले आशिंक स्वार्थभन्दा सम्पूर्ण स्वार्थ माथि हुने भन्दै कानुनमा केही कमजोरी भए सुधार गर्दै लैजाने तर निकुञ्ज संरक्षणको नियमलाई पालना गरेर अघि बढ्ने बताए । उनले मध्यवर्ती क्षेत्रका समस्या समाधानका निम्ती स्थानीय निकाय, सामाजिक संघ संस्था एवंम सरकारी पक्षविच बसेर थप छलफल गर्ने बताए ।
अहिले निकुञ्ज आसपासमा मन्दिर, क्लव र गुम्वा बनाउने बाहानामा जग्गा हड्प्ने प्रवृत्ति बढेको भन्दै मन्त्री पोखरेलले यस नाममा अतिक्रमण गर्ने प्रवृत्तिको विरोध गरे । ‘केहीले अहिले सार्वजनिक जमिनमा मन्दिर, क्लव र गुम्वा बनाएर अतिक्रमण गर्ने बडो कलात्मक शीप र शैली सिकेका छन्, त्यस्तो कुरा सहन गर्न सकिन्न’–मन्त्री पोखरेलले भने । कार्यक्रमा स्थानीय जनताले डाँडागाउँलाई जैविक पर्यटकीय स्थल बनाउनुपर्नेमा जोड दिएका थिए । 
