.gif)
 (1).png){kind=logo}
.png)
सलंकाको अर्धशतकमा विराटनगरले लुम्बिनीलाई दियो १६७ रनको लक्ष्य
काठमाडौं । चरिथ असलंकाको अर्धशतकको मद्दतमा विराटनगर किंग्सले नेपाल प्रिमियर लिग (एनपीएल) मा साविक विजेता लुम्बिनी लायन्सलाई १६७ रनको लक्ष्य दिएको छ ।
कीर्तिपुरस्थित त्रिभुवन विश्वविद्यालयको क्रिकेट मैदानमा टस हारेर पहिले ब्याटिङ गरेको विराटनगरले निर्धारित २० ओभरमा ४ विकेट गुमाएर १६६ रन बनाएको हो ।
विराटनगरका लागि असलंकाले ४३ बलमा १ चौका र ६ छक्कासहित सर्वाधिक ६४ रन बनाए । शुभम रन्जानेले २४ बलमा ४ चौकाको मद्दतमा अविजित ३१ रन जोडे ।
ओपनर इमरान शेख २४ रन बनाएर रिटायर्ड हर्ट भए भने लोकेश बमले १५ रन बनाए । शेहान जयसूर्या १ र इसुरु उडाना ६ रनमा आउट भए । बसिर अहमद ६ रनमा अविजित रहे ।
विराटनगर ७० रनमा एक विकेटको अवस्थामा रहँदा इमरान शेख रिटायर्ड हर्ट भएका थिए । त्यसपछि क्रिजमा आएका असलंकाले शुभम रन्जानेसँग मिलेर ७५ रनको साझेदारी गरे ।
बलिङमा लुम्बिनीका किशोर महतो, रुबेन ट्रम्पलम्यान र अभिषेष गौतमले समान एक विकेट लिए । किशोरले ४ ओभरमा २४ र अभिषेषले ३ ओभरमा १५ रन खर्चिए । ट्रम्पलम्यानले भने ४ ओभरमा ५२ रन दिए ।
प्लेअफमा पुग्ने सम्भावना कायम राख्न विराटनगरलाई यो खेल जित्नैपर्ने दबाब छ । पराजित भए विराटनगर प्रतियोगिताबाट बाहिरिनेछ ।
यता, लुम्बिनीले जित हासिल गरे अंकतालिकाको शीर्ष स्थानमा उक्लँदै पहिलो क्वालिफायर खेल्नेछ ।
