.gif)
 (1).png){kind=logo}
.png)
रास्वपा महाधिवेशन: निर्वाचन प्रक्रिया भद्रगोल, उम्मेदवारको अनुमति बिना नै क्लष्टर फेरबदल
काठमाडौं : राष्ट्रिय स्वतन्त्र पार्टी (रास्वपा) को प्रथम महाधिवेशन अन्तर्गत जारी केन्द्रीय सदस्यको निर्वाचन प्रक्रियामा गम्भीर प्राविधिक त्रुटि र अव्यवस्था देखिएको छ। उम्मेदवारहरूले नै निर्वाचन आयोगको कार्यशैली र मतदान प्रक्रियाप्रति सार्वजनिक रूपमा आपत्ति जनाएपछि महाधिवेशनको निर्वाचन व्यवस्थापन भद्रगोल देखिएको हो।
निर्वाचनमा सहभागी उम्मेदवारहरूले सामाजिक सञ्जालमार्फत आफ्नो नामको क्रम संख्या र निर्वाचन कोटासमेत अनायास परिवर्तन गरिएको भन्दै आक्रोश पोखेका छन्। उम्मेदवार आशिका तामाङले मनोनयन दर्ता गर्दा ३७ नम्बरमा रहेको आफ्नो नाम मतदान मेसिनमा १०६ नम्बरमा पुगेको भन्दै सो प्रक्रियाको पारदर्शितामाथि प्रश्न उठाएकी छिन्।
-
क्लष्टर फेरबदल: 'खुल्ला' कोटामा प्रचार गरिरहेका उम्मेदवार दीपक बोहरालाई अन्तिम समयमा आएर 'सुदूरपश्चिम प्रदेश भूगोल' क्लष्टरमा राखिएको पाइएको छ।
-
नामको क्रम संख्यामा मनपरी: मनोनयन दर्ता गर्दा ३७ नम्बरमा रहेको आफ्नो नाम मतदान मेसिनमा १०६ नम्बरमा पुगेको भन्दै उम्मेदवार आशिका तामाङले आपत्ति जनाएकी छिन्।
-
क्रमबद्धताको अभाव: उम्मेदवार यज्ञमणि न्यौपानेले खुल्ला सूचीको ४२ नम्बरमा रहेको आफ्नो नाम पछि फारम भरेकाहरूको नाम अगाडि राखिएको र मतदान मेसिनमा वर्णानुक्रम नमिलेको उल्लेख गरेका छन्।
-
उम्मेदवारीको स्पष्टीकरण: उम्मेदवार शिव नेपालीले आफू समावेशी नभई समग्र खुल्ला तर्फबाट नै चुनाव लडेको भन्दै मतदाता समक्ष स्पष्टीकरण दिनुपर्ने अवस्था सिर्जना भएको छ।
त्यसैगरी, अर्का उम्मेदवार यज्ञमणि न्यौपानेले पनि आफ्नो नाम खुल्ला सूचीको ४२ नम्बरमा राखिएको भए तापनि पछि फारम भरेकाहरूको नाम अगाडि राखिएको उल्लेख गर्दै मतदान मेसिनमा कुनै पनि प्रकारको क्रमबद्धता (वर्णानुक्रम) नमिलेको बताएका छन्।
कोटा निर्धारणमा पनि व्यापक अन्योल देखिएको छ। उम्मेदवार दीपक बोहराले आफूले 'खुल्ला' कोटाबाट प्रचारप्रसार गरेकोमा अन्तिम समयमा आएर आफूलाई 'सुदूरपश्चिम प्रदेश भूगोल' कोटामा राखिएको जानकारी गराएका छन्। त्यस्तै, अर्का उम्मेदवार शिव नेपालीले आफू समावेशी नभई समग्र खुल्ला तर्फबाट उम्मेदवार रहेको भन्दै स्पष्टीकरण दिनुपरेको छ।
उम्मेदवारहरूबाटै निर्वाचन प्रक्रियामा गम्भीर त्रुटि भएको गुनासो सार्वजनिक भएपछि रास्वपाको यस आन्तरिक निर्वाचनको विश्वसनीयतामाथि प्रश्न उठेको छ। उम्मेदवारहरूले आफ्ना मतदाताहरूलाई भ्रममा नपर्न आग्रह गरे पनि, निर्वाचन व्यवस्थापनमा देखिएको यो 'भद्रगोल' अवस्थाले महाधिवेशनको गरिमामाथि नै आँच पुर्याएको टिप्पणी सुरु भएको छ। यस सम्बन्धमा पार्टीको निर्वाचन आयोगले अहिलेसम्म कुनै औपचारिक स्पष्टीकरण दिएको छैन।
