.gif)
 (1).png){kind=logo}
.png)
भारतीय जहाजमाथि अमेरिकी हमला, अमेरिकालाई बुझाइयो कूटनीतिक विरोधपत्र
अमेरिकी आक्रमणमा ३ भारतीय नाविक बेपत्ता
काठमाडौं : ओमानको तटनजिकै बुधबार एउटा व्यापारिक जहाजमाथि अमेरिकी सेनाले गरेको आक्रमणप्रति भारत सरकारले कडा निन्दा गर्दै नयाँ दिल्लीस्थित अमेरिकी दूतावासमार्फत औपचारिक विरोध दर्ता गराएको छ। पलाउको झण्डा बोकेको र अमेरिकी वैदेशिक सम्पत्ति नियन्त्रण कार्यालयको कालोसूचीमा समेत नरहेको ‘सेटेबेलो’ नामको जहाजमाथि सटिक प्रहार गर्न सक्ने हतियार प्रयोग गरी आक्रमण गरिएको थियो।
उक्त जहाजमा २४ जना भारतीय नाविक सवार रहेकामा २१ जनाको सकुशल उद्धार गरिएको छ भने चालक दलका तीन भारतीय सदस्य हालसम्म बेपत्ता छन्। भारतीय परराष्ट्र मन्त्रालयका अतिरिक्त सचिव नागराज नायडुले अमेरिकी कार्यवाहक राजदूत जेसन मिक्सलाई बोलाएर औपचारिक कूटनीतिक विरोधपत्र बुझाउँदै नाविकहरूको सुरक्षालाई उच्च प्राथमिकता दिन र व्यापारिक जहाजहरूलाई निशाना बनाउने कार्य तत्काल बन्द गर्न माग गरेका छन् ।
भारतीय चालक दलका सदस्यहरू सवार जहाजमाथि अमेरिकी सेनाले गरेको यो दोस्रो आक्रमण हो, यद्यपि पहिलो घटनामा भारतले सार्वजनिक विरोध जनाएको थिएन। यसअघि गत अप्रिलमा इरानले होर्मुज जलमार्ग हुँदै गइरहेका भारतीय ट्यांकरहरूलाई निशाना बनाउँदा पनि भारतले इरानी राजदूतलाई बोलाएर विरोध प्रकट गरेको थियो। हालैका दिनमा क्षेत्रीय जलमार्गमा भइरहेका लगातारका आक्रमणहरूलाई भारतले गम्भीर चिन्ताको विषय भएको बताएको छ।
परराष्ट्र मन्त्रालयले व्यापारिक जहाज तथा नागरिक पूर्वाधारमाथि हुने यस्ता आक्रमणहरू तत्काल बन्द हुनुपर्ने र अन्तर्राष्ट्रिय कानुनबमोजिम जलमार्गमा स्वतन्त्र तथा अवरोधरहित नौवहन र व्यापार पुनःस्थापित गरिनुपर्ने कुरामा विशेष जोड दिएको छ।
