नव विवाहित महिलाको शंकास्पद मृत्यु, हत्या भएको माइती पक्षको दावी

---

नयाँ पेज

२०८२ बैशाख ३० मंगलबार २०:३९ बजे

रौतहट । रौतहटको कटहरिया नगरपालिकामा विवाह भएको ६ महिना नपुग्दै एक मुस्लिम महिलाको शंकास्पद मृत्यु भएको छ। उनको माइती पक्षले दाइजोको कारण हत्या गरिएको दाबी गर्दै घटनाको छानबिन गरी कडा कानूनी कारबाही हुनुपर्ने माग गरेको छ । 

कटहरिया–३ बड़ेरवा टोलमा घर भई हाल कटहरिया– ५ बजार क्षेत्रमै घर भएका अहमद राय भाटको छोरा अरमान राय भाटकी श्रीमती २१ वर्षीया सानिया प्रविनको शंकास्पद मृत्यु भएको हो । आइतबार दिउँसो आफ्नै घरको कोठामा साडीको पासो बनाई सिलिङ फ्यानमा झुण्डिएको अवस्थामा सानियाको शव भेटिएको प्रहरीले जनाएको छ ।

घटनाको खबर लगत्तै इलाका प्रहरी कार्यालय कटहरिया र इलाका प्रहरी कार्यालय गरुडाको संयुक्त टोलीले घटनास्थलमा पुगेर मुचुल्का तयार गरी शवलाई पोष्टमार्टमका लागि प्रादेशिक अस्पताल गौरमा पठाएको थियो। मृतकको पोष्टमार्टम भएर शव सत्गतको लागि मृतक सानियाकी आमा भारतको बिहार पूर्वी चम्पारण जिल्ला सुगौली घर भएकी कायमा खातुनले बुझेर लागेको प्रहरीले जनाएको छ ।

मृतककी आमा कायमा खातुनका अनुसार सानियाको विवाह करिब ६ महिनाअघि मात्र अरमान राय भाटसँग मुस्लिम परम्परा अनुसार भएको थियो । विवाहपछि ज्वाई अरमानले निरन्तर दाइजोको लागि छोरी सानियालाई अनेक प्रकारले शारीरिक तथा मानसिक यातना दिँदै आएका थिए। 

ज्वाइँ तथा उनको परिवारले योजनाबद्ध तरिकाले सानियाको हत्या गरी आत्महत्या देखाउन खोजेको कायमाले दाबी गरेकी छिन् । घटनामा संलग्न अरमानसहित सबैलाई पक्राउ गरी कडा कानूनी कारबाही हुनुपर्ने सानियाको माइती पक्षले माग गरेको छ । माइती पक्षले छोरीको हत्या भएको भन्दै इलाका प्रहरी कार्यालय गरुडामा जाहेरी दर्ता गरेको जनाएको छ।

इलाका प्रहरी कार्यालय गरुडाका प्रमुख डीएसपी राजन कार्कीले घटनाविरुद्धको जाहेरी हालसम्म दर्ता नभएको तथा घटना शंकास्पद भएको संकेत दिएका छन्। उनले घटनाको अनुसन्धानपछि मात्र यकिन साथ भन्नसक्ने अथवा कानूनी प्रक्रिया अगाडि बढाइने बताएका छन्।