पार्टी एकताको निर्णायक वार्तामा राउत र चौधरी बाँकेमा, बन्ला छैटौं ठूलो दल ?

---

नयाँ पेज

१४:२७ बजे

काठमाडौं । पार्टी एकताबारे निर्णायक वार्ताका लागि जनमत पार्टीका अध्यक्ष डा. चन्द्रकान्त (सीके) राउत र नागरिक उन्मुक्ति पार्टी (नाउपा) का संरक्षक रेशम चौधरी बाँके पुगेका छन् । राउत र चौधरी निर्णायक वार्ताका लागि पार्टीका कार्यदलका सदस्यहरूसहित बाँकेको गाभर भ्याली पुगेका हुन् ।

पार्टी प्रवक्ता समेत रहेका जनमत पार्टीका तर्फबाट गठित कार्यदलका सदस्य डा. शरदसिंह यादवका अनुसार एकता बारेको निर्णायक वार्ताको तयारी गरिएको छ । ‘वार्ताको प्रक्रियामै छौँ, अब वार्ता सुरु हुन्छ’, उनले सुनाए । जनमत र नागरिक उन्मुक्तिबीच पार्टी एकता लगभग पक्कापक्की भइसकेको छ । एकता प्रक्रिया टुङ्ग्याउनका लागि दुबै पार्टीले कार्यदल गठन गरेका छन् । कार्यदलले आ–आफ्नो तर्फबाट एकताबारे प्रस्ताव तयार पारेका छन् ।

वार्ताका क्रममा दुबै कार्यदलका प्रस्तावमाथि छलफल गर्ने र पार्टी एकताको एकीकृत दस्ताबेज तयार पार्ने नेताहरूले बताएका छन् । दुबै कार्यदलले एकीकृत पार्टीको अध्यक्ष, चुनाव चिह्न, पार्टी समितिहरूको संख्यालगायतका विषयहरू प्रस्तावित गरेका छन् । ती विषयहरू वार्ताका क्रममा टुङ्ग्याउने काम हुने बताइएको छ । स्रोतहरूले उल्लेख गरेअनुसार पार्टीको नाम नागरिक जनमत पार्टी रहने छ भने अध्यक्षमा डा. चन्द्रकान्त राउत र संरक्षकमा रेशम चौधरी रहनेछन् । यस्तै पार्टीको चुनाव चिह्न भने ढकिया रहने बताइएको छ ।

 एकताको लागि ९ बुँदे सहमतिको खाका बनाइएको छ । उक्त खाकाका विषयमा दुई दलका नेताबीच सहमति जुटेपछि एकताको घोषणा गर्ने तयारी छ । दुई पार्टीको एकतापछि बन्ने नयाँ पार्टी प्रतिनिधिसभाको छैटौं ठूलो दल बन्ने छ । अहिले संसदमा रहेका १३ वटा दलमध्ये जनमत आठौं र नागरिक उन्मुक्ति एघारौं पार्टीको रूपमा छन् । यदि यी दुई दलबीच एकता भयो भने त्यो पार्टी छैटौं ठूलो दल बन्नेछ । एकीकृत पार्टीको सांसद संख्या १० हुन्छ।