.gif)
 (1).png){kind=logo}
.png)
उपमेयर डंगोल बेल्जियम प्रस्थान
काठमाडौं । काठमाडौं महानगरपालिकाकी उपमेयर सुनिता डंगोल युरोपियन युनियनको निमन्त्रणामा आज बेल्जियम प्रस्थान गरेकी छन्। त्यहाँ हुने बैठक, छलफल, भेटघाट र अवलोकन भ्रमणमा शहरी विकास, विधायिकी र न्यायिक अभ्यास, स्थानीय शासनसम्बन्धी असल अभ्यासका विषयमा अनुभव आदानप्रदान गर्ने कार्यक्रम छ।
युनियनका दक्षिण एसियाली क्षेत्र हेर्ने विज्ञ र अधिकारीहरुसँग उनले अन्तर्राष्ट्रिय सहयोग, समन्वय र साझेदारीका अभ्याससम्बन्धी विषयमा बैठक गर्ने बताइएको छ । यसैगरी संसद सञ्चालन र विधायिकी अभ्यासका विषयमा संसद सदस्यहरुसँग छलफल हुनेछ।
यस्तै लक्जेम्बर्गमा स्थानीय न्यायिक अभ्यास, इजलास, मेलमिलाप र वैकल्पिक विवाद समाधान (अल्टरनेटिभ डिस्प्युट रिजोलेसन–एडीआर) को अभ्यास अवलोकन गर्ने कार्यतालिका छ । स्थानीय तह (स्थानीय सरकार) का प्रतिनिधिहरुसँग शहरी विकास वितरण र व्यवस्थापन तथा स्थानीय शासन व्यवस्थापन र प्रवद्र्धनमा तहगत दायित्वका विषयमा कुराकानी हुने बुझिएको छ। यस क्रममा उनले काठमाडौं महानगरपालिकाका सम्भावना र असल अभ्यासका विषयमा जानकारी गराउने कार्यक्रम छ ।
यस क्रममा रचनात्मक उद्योगसम्बन्धी कार्यहरु, नेपाली सभ्यता, मौलिक र परम्परागत कला, संस्कार, संस्कृति र सांस्कृतिक सम्पदा गरिमासम्बन्धी विषय समेटिने छन्। यस्तै लैङ्गिमैत्री शहर निर्माणका प्रयास, स्थानीय विवाद समाधानमा महिला सञ्जालको गठन र सञ्चालन, वडास्तरीय मेलमिलाप कक्षसम्बन्धी विषय समेटिने छन् ।
