.gif)
 (1).png){kind=logo}
.png)
प्रधानमन्त्री शाहबाजद्वारा इमरान खानको पार्टीसँग पुनः वार्ता पुनः गर्ने इच्छा व्यक्त
काठमाडौं । पाकिस्तानका प्रधानमन्त्री शाहबाज सरिफले पाकिस्तान तहरीक–ए–इन्साफ (पिटिआई) सँग पुनः वार्ता सुरु गर्ने इच्छा व्यक्त गरेका छन् । साथै उनले जारी मुद्दाहरूलाई सम्बोधन गर्न संसदीय समिति गठन गर्ने प्रस्ताव गरेको द एक्सप्रेस ट्रिब्युनले जनाएको छ । संघीय मन्त्रिपरिषद् बैठकमा सरिफले पिटिआईको प्रस्तावपछि समिति गठन गरी सुरु भएको पिटिआईसँगको अघिल्लो वार्तालाई सम्झाए । इमरान खानले स्थापना गरेको पार्टीले राष्ट्रिय सभाको अध्यक्षमार्फत लिखित माग पेस गरेको र सरकारले लिखित जवाफ दिने अपेक्षा गरिएको उनले बताए । तर पिटिआईले २८ जनवरीको निर्धारित बैठक रद्द गर्यो।
प्रधानमन्त्री सरिफले लिखित मागको लिखित जवाफ दिनु तार्किक भएको बताए । सन् २०१८ को चुनावपछि विपक्षीहरू कालो पट्टी बाँधेर संसदमा प्रवेश गरेपछि पाकिस्तानका तत्कालीन प्रधानमन्त्री इमरान खानले चुनावसँग सम्बन्धित चिन्ताको छानबिन गर्न संसदीय समिति गठन गर्न पहल गरेको उनले बताए । द एक्सप्रेस ट्रिब्युनका अनुसार पिटिआईले कहिल्यै न्यायिक आयोग गठन नगरेको तर एउटा समिति गठन गरेको उनले बताए ।
पाकिस्तानका प्रधानमन्त्रीले सन् २०१८ र २०२४ मा भएको चुनावको अनुसन्धान गर्न र तथ्यहरू बाहिर ल्याउन नयाँ समिति गठन गर्न वार्ता पुनः सुरु गर्न र मिलेर काम गर्न पिटिआईलाई आह्वान गरे । यसअघि बुधबार पिटिआई अध्यक्ष ब्यारिस्टर गोहर खानले सरकारलाई जानाजानी संवादबाट बच्ने र पार्टीको न्यायिक आयोग गठनको माग बेवास्ता गरेको आरोप लगाएका थिए ।
बुधबार रावलपिन्डी कछेरी बाहिर पत्रकारहरूसँग कुरा गर्दै उनले पिटिआईले औपचारिक रूपमा सरकारलाई उनीहरूको प्रमुख चिन्ताहरू सम्बोधन गर्न न्यायिक आयोग गठन गर्न अनुरोध गरेको बताए । तर सरकारले उनीहरूको मागको जवाफ दिएन । ‘उनीहरू वार्ता होस् वा समाधान होस् भन्ने चाहँदैनथे’, उनले अधिकारीहरूलाई जानाजानी वार्तामा ढिलाइ गरेको आरोप लगाउँदै भने, ‘हामीले हाम्रा मागहरू प्रस्तुत गर्र्यौ तर सरकारले कुनै गम्भीर कदम चालेको छैन । यदि तिनीहरू इमानदार थिए भने, तिनीहरूले समयमै जवाफ दिने थिए ।’
गोहर अली खानले अधिकारीहरूले जनवरी २८ सम्म समिति कक्षमा जवाफ दिने वाचा गरेको बताए । यद्यपि उनले पिटिआईलाई निर्णयको बारेमा अग्रिम विवरण नदिइएको बताए । इमरान खानले स्थापना गरेको पार्टीले राजनीतिक दबाबको सामना गरे पनि वार्ता प्रक्रिया सुरु गरेकोमा उनले जोड दिए । पाकिस्तान राष्ट्रिय सभाका अध्यक्ष अयाज सादिकले मङ्गलबार चौथो चरणको वार्ताका लागि पिटिआई र सरकारका प्रतिनिधिहरूलाई आमन्त्रित गरेका थिए तर पिटिआईका प्रतिनिधिहरू बैठकमा सहभागी भएनन् ।
पछि पाकिस्तान सरकारले आफ्नो वार्ता समितिले जनवरी ३१ सम्म पर्खने भन्दै यदि पिटिआईले वार्ता समाप्त गर्ने आफ्नो निर्णय परिवर्तन गर्यो भने प्रक्रिया पुनः सुरु हुनसक्ने घोषणा गर्यो । राजनीतिक तनावलाई सम्बोधन गर्न सरकार र विपक्षीबीच डिसेम्बरमा वार्ता सुरु भएको थियो । एक्सप्रेस ट्रिब्युनका अनुसार त्यसबेलादेखि दुवै पक्ष तीन पटक भेटेका छन् । रासस
