.gif)
 (1).png){kind=logo}
.png)
२०८७ मा संविधान संशोधन गर्छौं भन्नु गठबन्धनको औचित्य समाप्त हुनु सरह : डा. रिजाल
काठमाडौं । सत्ता साझेदार नेपाली कांग्रेसका नेता डा. मीनेन्द्र रिजालले २०८७ मात्रै संविधान संशोधन गर्छौ भन्नु गठबन्धनको औचित्य समाप्त हुनु सरह भएको टिप्पणी गरेका छन् । कांग्रेस–एमालेबीचको सात बुँदे सहमति नै संविधान संशोधनको लागि भएको भन्दै रिजालले प्रधानमन्त्री केपी शर्मा ओलीको भनाइले सत्ता गठबन्धनकै औचित्यमाथि प्रश्न उठाएको बताएका हुन् ।
‘२०८७ मा मात्रै संविधान संशोधन गर्छौ भन्नु गठबन्धनको औचित्य समाप्त हुनु सरह हो । किनभने गठबन्धन अन्ततः संविधान संशोधनको लागि निर्माण भएको हो । संविधान संशोधन नगर्ने हो भने उत्तरदायी राजनीति नहुने भयो,’ रिजालले भने, ‘कांग्रेस र एमालेले सत्ता चलाउन संख्या पुगेन भनेर सरकार बनाएका होइनन् । कसैलाई दण्डित गर्न पनि यो सरकार बनेको होइन । कसैलाई रोक्न र छेक्न पनि बनेको होइन । सात बुँदे सहमति पढ्दा बुझिने कुरा यही हो।’
सरकारले सबै दलसँग संवाद गरेर संविधान संशोधनको विषय अगाडि बढाउनु पर्ने उनले बताएका छन् । ‘सरकारले जनताको यो निराशा चिर्न सक्नुपर्यो’, रिजालले थपे, ‘जनतामा आशा जगाएर विश्वास दिलाउनु पर्यो । जनतासँग विश्वास लिएपछि अरू राजनीतिक दलसँग पनि संवाद गरेर संविधान संशोधन गर्ने भनेको हो ।’
प्रधानमन्त्रीको भनाइले कांग्रेस र एमाले सत्ताको लागि मात्रै मिलेको अर्थ दिने उनको भनाइ छ । ‘प्रधानमन्त्रीले भने जस्तो २०८७ मात्रै संविधान संशोधन गर्ने हो भने हामी खाली सत्ताको लागि अगाडि बढेका हौं भन्ने अर्थ लाग्छ । सत्ताकै लागि हो भने त प्रतिपक्षीविहीन सत्ता चलाउन खोजेको अर्थ हुन्छ,’ रिजालले भने, ‘हाम्रो लोकतन्त्रले प्रतिपक्षीविहीनताको सत्ता संरचनाको परिकल्पना गरेको छैन । यस्तो गर्न खोजिएको हो भने संसदीय व्यवस्था विपरीतको कुरा हो । सत्ता मात्रै प्रमुख कुरा हो भने सत्ता र सात बुँदेको औचित्य समाप्त भयो भन्नु सरह हो ।’
