.gif)
.png)
'दुर्गा प्रसाईले कहिले मेरो हजुरवाउ भन्छ, कहिले काका तर ओलीजी किन मौन ?'
२०७५ श्रावण ५ शनिबार २०:२५ बजे
डाक्टर केसीको समर्थनमा शनिबार माइतीघरबाट बानेश्वरसम्मको प्रदर्शनपछि आयोजित कोणसभामा बोल्दै कार्कीले भनिन् ‘चारवटा ठेकेदारलाई मोटो बनाएर देश बन्छ ? त्यो व्यक्ति (दुर्गा प्रसाईँ)लाई अस्ति मैले यूट्युवमा हेरेँ, केपी ओली मेरो हजुरवाउ भन्छ, कहिले काका भन्छ । घोर बेइज्जती गरिँरैछ ओलीजीको तैपनि उहाँहरु मौन हुनुहुन्छ ।’
कार्कीले विर्तामोड स्थित बी एण्ड सी मेडिकल कलेजका सञ्चालक प्रसाईले ओलीको बदनाम गरेको बताएकी हुन् । उनले भनिन्, 'मैले मार्सी भात ख्वाकै हो भन्छ, थालमा ख्वाकै हो भन्छ । यो त लाजमान्नुपर्ने कुरा हो, त्यसैकारण म धेरै लामो बोल्दिन, मेरो भनाई यति नै हो यो आम जनता सडकमा त्यतिकै आएको हैन ।'
यसअघि प्रसाईले आफू ५६ सालदेखि जनयुद्ध लडेको, ६ महिना जेल बसेको र गणतन्त्र ल्याउन आफ्नो योगदान दिएको बताएका थिए । उनले प्रचण्ड र केपी ओलीलाई एक ठाउँमा राखेको दालभात खुुवाएर एउटै कम्युनिस्ट पार्टी बनाउन आफूले योगदान गरेको दाबी गरेका थिए ।
कार्कीले डा. गोविन्द केसीको माग सरकारले पुरा नगरे देशमा आगो बल्ने बताईन् । भनिन्, ‘सरकारले जनताको माग सम्वोधन गर्नु पर्छ । सरकारले जनताको माग सम्वोधन गर्दैन भने अलोकप्रिय हुन्छ । यदि सरकारले केसीको माग पूरा गर्दैन भने देशमा आगो बल्छ ।’
उनले आन्दोलन कुनै राजनीतिक पार्टीको समर्थनमा नभएको बताएकी छन् । भनिन्, ‘डाक्टर केसीले त्यही माग्नुभएको हो, गरीबलाई शिक्षा देऊ । स्वास्थ्यमा सुलभ गराउ भनेर मागेको हो, उनको माग सबैको माग हो । अहिलेको सरकारले यसलाई बुझपचाएर नबुझेको जस्तो गरेपनि आम जनताले बुझेका छन् । जनता त्यो पक्षमा छ । त्यसैले म सरकारसँग के अनुरोध गर्दछु भने डाक्टर केसी र डाक्टर केसीका समर्थक कुनै दलका कार्यकर्ता होइनन् ।’
कार्कीको गरेको भाषणको पूर्ण पाठ :-
डा गोविन्द केसीलाई कोरामिन दिएर भएपनि बचाउनुपर्छ, त्यो सरकारको धर्म हो । अहिले जुन सरकार आयो, यो सरकारको र प्रतिपक्षको पनि अस्ति भएको चुनावमा जनतालाई स्वास्थ्य र शिक्षा सर्वसुलभ गराउने भन्ने घोषणापत्र थियो । त्यस्तो बचन राखेर उनीहरुले चुनाव जितेका थिए । डाक्टर केसीले आज जे मागेका छन् तेह्र–चौध पटकको यो जुन अनसन छ, उनले जे मागेका छन् त्यो आफ्नो नीजि निम्ति मागेका हैनन् । हो, कसको निम्ति, जनताको निम्ति । तपाई हाम्रो निम्ति मागेको हो ।
देशमा एउटा आदर्श सरकारले देशमा शिक्षा र स्वास्थ्य भएसम्म गरीबहरुलाई सुलभ गराउनुपर्छ । जो असक्त हुन्छ, त्यसलाई गराउनुपर्छ । यदी गरीबको जीवनस्तर सुधार्ने हो भने गरीबका छोराछोरीलाई डाक्टर पढाउनुपर्यो, धनीकालाई हैन । डाक्टर केसीले त्यही माग्नुभएको हो, गरीबलाई शिक्षा देऊ । स्वास्थ्यमा सुलभ गराउ भनेर मागेको हो, उनको माग सबैको माग हो । अहिलेको सरकारले यसलाई बुझपचाएर नबुझेको जस्तो गरेपनि आम जनताले बुझेका छन् । जनता त्यो पक्षमा छ । त्यसैले म सरकारसँग के अनुरोध गर्दछु भने डाक्टर केसी र डाक्टर केसीका समर्थक कुनै दलका कार्यकर्ता होइनन् ।
अंग्रेजीमा एउटा शब्द छ– क्यामाफ्लोज भन्ने । आफ्नो शासनको शैलीमा कहिले डाक्टर केसीलाई कांग्रेस भनेको छ, कहिले अरुलाई कांग्रेस भनेको छ, त्यो बेकार हो । सरकारमा बस्ने प्रत्येकले बुझेका छन् डाक्टर केसीले जनताको आवाज बोलेको छ किनभने डाक्टर केसीले जनताको लागि गरेको काम सबैले बुझेको छ । डाक्टर केसीले मरेर जाँदा यो नेपालबाट केही लादैनन् । उनी त अमरत्व प्राप्त गरेका ब्यक्ति हुन् अघि पनि भन्नुभयो संग्रौलाजीले ।
त्यसैले यो बेकार छ, म कहाँसम्म माग गर्छु भने उहाँका माग पूरा हुनुपर्छ । पूरा गर्नैपर्छ । ७ पढेको, ८ पढेको, १० पढेको व्यक्तिलाई धनी बनाएर हुन्न । हुन त म आफ्नै मन्त्रीलाई गाली गर्दिन । माफिया पनि भन्दिनँ, डन पनि भन्दिनँ । अमेरिकामा बिल गेट्सले जति कमाउछन् जनतामा लगेर बाँड्छन् ।
अस्ति एउटा खेलाडीले विश्वकप जित्दाखेरी आम जनतालाई बाँडे । नेपालमा ती कमाउनेहरुले नेपाल बनाइदिएको देखाइदिनुप¥यो मलाई यो सरकारले । त्यस्ता व्यक्तिलाई किन पोस्ने ? म अहिलेको सरकारमा बसेका पढेलेखेका प्रबुद्ध ब्यक्तिलाई समाजवाद के हो ? लोकतन्त्र के हो ? प्रजातन्त्र के हो ? म सिकाउन आएको हैन ती ज्ञानी छन् यो कुराको । बुझ्नुपर्छ, समाजवाद भनेको के हो भनेर, त्यो लागू कसरी हुन्छ भनेर । किनभने आम जनता गरीबलाई उठायो भने समाजवाद हुन्छ । चारवटा ठेकेदारलाई मोटो बनाएर देश बन्छ ? त्यो व्यक्ति (दुर्गा प्रसाईँ)लाई अस्ति मैले यूट्युवमा हेरेँ, केपी ओली मेरो हजुरवाउ भन्छ, कहिले काका भन्छ । घोर बेइज्जती गरिँरैछ ओलीजीको तैपनि उहाँहरु मौन हुनुहुन्छ ।
मैले मार्सी भात ख्वाकै हो भन्छ, थालमा ख्वाकै हो भन्छ । यो त लाजमान्नुपर्ने कुरा हो, त्यसैकारण म धेरै लामो बोल्दिन, मेरो भनाई यति नै हो यो आम जनता सडकमा त्यतिकै आएको हैन । हामी त्यसरी आएको हैनौँ । यो सरकारका बिरोधी हैनौँ, उनले भोट पाका छन् जनताबाट हामी मान्दछौँ, सरकार खसोस् भन्ने पनि हाम्रो हैन । तर सरकारले जनताले भनेको मान्नुपर्छ ।
मानेन भने अनपपुलर हुन्छ । मेरो फेरि पनि आग्रह छ, अन्यथा नलिइओस्, यसलाई पोलिटिकल भनेर क्यास गर्ने प्रयास नगरियोस्, फरक पर्छ यो सामाजिक आन्दोलन हो । यसमा डाक्टर केसीले के मागेका छन् त्यो पूरा गर्नुपर्छ । यदी पूरा भएन भने देशमा आगो बल्छ । यति भन्दै म बिदा हुन्छु । 
