थाइल्याण्डमा प्रधानमन्त्रीलाई गार्ड अफ अनर {तस्वीरहरु}

---

नयाँ पेज

११:४१ बजे

काठमाडौं । थाइल्याण्ड भ्रमणमा रहेका प्रधानमन्त्री केपी शर्मा ओलीलाई गार्ड अफ अनर दिइएको छ । थाइल्याण्डको औपचारिक भ्रमणमा रहेका प्रधानमन्त्री केपी शर्मा ओलीलाई बैंककमा बुधबार बिहान गार्ड अफ अनर दिइएको हो ।

समारोहमा थाइल्याण्डका प्रधानमन्त्री पे थोङ् थान् शिनावात र मन्त्रीहरूसहित उच्च अधिकारीले स्वागत गर्नुका साथै गार्ड अफ अनर निरीक्षण गरेका थिए । नेपाल–थाइल्याण्ड कूटनीतिक सम्बन्धको ६५ वर्षको इतिहासमा पहिलो पटक नेपाली प्रधानमन्त्रीले थाइल्याण्डको औपचारिक भ्रमण गरेका छन् ।

आजै प्रधानमन्त्री ओली र थाइ समकक्षी शिनावातबीच भेटवार्ता हुँदैछ । यो भ्रमणबाट दुई देशबीचको आपसी सम्बन्ध विस्तार र सहकार्यमा योगदान पुग्ने अपेक्षा गरिएको छ । परराष्ट्र मन्त्रालयका अनुसार भेटवार्तापछि संस्कृति र पर्यटनका क्षेत्रमा सहकार्यसम्बन्धी सम्झौतापत्रमा हस्ताक्षर हुने छ। यसैगरी दुई देशबीचका गैरसरकारी र व्यावसायिक संस्थाबीच विभिन्न छ सहमतिपत्र आदाप्रदान हुनेछ।

सम्झौतापछि दुवै प्रधानमन्त्रीले संयुक्त पत्रकार सम्मेलन गर्ने कार्यक्रम छ । त्यसपछि प्रधानमन्त्री ओली आफ्नो सम्मानमा समकक्षी सिनावातले आयोजना गरेको दिवभोजमा सहभागी हुनेछन् । प्रधानन्त्री ओलीले आजै थाइल्याण्डका राजा महा बजिरालोङकर्नसँग शिष्टाचार भेट गर्ने कार्यक्रम छ । प्रधानमन्त्री ओली पाँच दिने औपचारिक भ्रमणका लागि मंगलबार दिउँसो त्रिभुवन अन्तर्राष्ट्रिय विमानस्थलबाट थाइल्याण्ड प्रस्थान गरेका हुन् ।