.gif)
 (1).png){kind=logo}
.png)
राप्रपा अध्यक्ष लिङ्देनको प्रश्न : राजा हटाएर नारायणहिटीमा कसले व्यापार गर्न खोज्यो ?
काठमाडौं । राष्ट्रिय प्रजातन्त्र पार्टी (राप्रपा) का अध्यक्ष राजेन्द्र लिङ्देनले राजा हटाएपछि नारायणहिटीमा व्यापार गर्न र लुट मच्चाउन खोजिएको बताएका छन् । आज (सोमबार) संसद बैठकलाई सम्बोधन गर्दै लिङ्देनले ठूला भनिएका दलका नेताको शब्दजाल र मिथ्या कुरा अहिलेको पुस्ताले नमान्ने बताए ।
‘सबै कुराको जवाफ दिन मसँग समय छैन । मेरा मित्रलाई भन्छु– कथाले, शब्द जालले अहिलेको पुस्ता मान्नेवाला छैन । मिथ्या इतिहासले युवाहरूले मान्नेवाला छैन । अहिलेको डिजिटल दुनियाँमा,’ उनले भने, तपाईले राजा हटाएपछि नारायणहिटीमा कसले व्यापार गर्न खोज्यो ? गणतन्त्रको नाममा लुटतन्त्र मच्चाउनु भयो ।’
‘तपाईका कीर्ते कुरा म भन्दा पछिल्लो पुस्ताले मान्दैन । विकास निर्माणको खर्च कति तपाईंको पेट भर्न गयो भन्ने हिसाब चाहियो,’ उनले भने, ‘एयरपोर्ट बनाएको कुरा राम्ररी हेरेको छ । नेपाली जनतालाई भुटानी शर्णार्थी बनाएर बेचेको हेरिरहेको छ ।’
सम्बोधनमा उनले बेलायतमा राजा फालेर फेरि स्थापित भएको उदाहरण पनि पेस गरेका छन् । ‘व्यवहारमा सुधार नभएसम्म गणतन्त्रको विरोध जारी रहन्छ । बेलायतमा राजा निरंकुश भए भनेर फाँसीमै चढाए । गणतन्त्रवादीको चालचलन तपाईहरूको जस्तै भएर राजाका छोरालाई ल्याएर गद्दीमा चढाए,’ उनले भने, ‘जनताले चाहे भने यो व्यवस्था जान्छ । १५ गतेको प्रदर्शनको जिम्मा सरकारको हो । छतमाथि बसेर म्याद सकिएको अश्रुग्यास किन बर्साइयो ? न्यायीक छानबिन गठन होस् ।’
‘आन्दोलनमा तोडफोड हुन्छ, तपाईं कांग्रेस–एमाले भजन गाएर सत्तामा आइपुगेको हो ? तपाईले तोडफोड गर्नु भएन ?’, लिङ्देनले भने, ‘सविन महर्जनलाई किन हिँड्दाहिँड्दै गोली हानियो ? छतमा बसेर किन म्याद सकिएको टियरग्यास बर्साइयो ?’ उनले तीनकुने घटनालाई अन्तर्राष्ट्रिय समुदायले पनि हेरिरहेको बताए । ‘यसको न्यायिक छानबिन समिति गठन गर्न माग गर्दछु’, लिङ्देनले भने ।
