गाजामा इजरायलको भीषण आक्रमण : मृतकको संख्या २२० पुग्यो

---

नयाँ पेज

२०८१ चैत ५ मंगलबार १७:०७ बजे

जेरुसेलम । गाजामा मंगलबार इजरायलले गरेको भीषण हवाई आक्रमणमा परी अहिलेसम्म २२० भन्दा बढी प्यालेस्टिनीको मृत्यु भएको छ ।  गाजाका अधिकारीका अनुसार मृत्यु हुनेहरुमा गाजा क्षेत्रमा रहेका हमासका उच्च सुरक्षा अधिकारी मोहम्मद अबु वफा पनि रहेका छन् । इजरायलले हमासका क्षेत्रहरु र उनीहरु बसेका सम्भावित संरचनाहरुलाई लक्षित गरी आक्रमण गरिरहेको छ ।

इजरायलले हवाई आक्रमण गर्नुअघि अमेरिकी राष्ट्रपति डोनाल्ड ट्रम्पको प्रशासनसँग छलफल गरेको ह्वाइट हाउसकी एक प्रवक्ताले फक्स न्यूजलाई बताएकी छन् । इजरायली प्रधानमन्त्री कार्यालयबाट जारी विज्ञप्तिमा पहिलो चरणको युद्धविराम प्रस्ताव अस्वीकार गरेकाले आक्रमण गरेको बताइएको छ । हमासलाई दबाव दिन इजरायलले गाजामा मानवीय सहायता र विद्युत् आपूर्ति कटौती गरिएको छ । एजेन्सी