.gif)
 (1).png){kind=logo}
.png)
महानगरमा तनाव हुँदा कहाँ थिए बालेन ?
काठमाडौं । काठमाडौं महानगरपालिकामा आज (बिहीबार) तनाव भयो । सरकारले पठाएका प्रमुख प्रशासकीय अधिकृत सरोज गुरागाईलाई प्रवेशमा रोक्न खोजिँदा जनप्रतिनिधि–कर्मचारी एकतिर र महानगर प्रहरी अर्कोतिर ठेलमठेलको अवस्था सिर्जना भयो ।
अधिकृत गुरागाईलाई महानगर प्रवेश गराएर हाजिर गराउने कामको नेतृत्व उपप्रमुख सुनिता डंगोलले गरिन् । अन्ततः उनी कार्यकक्ष छिरेर हाजिर गरे । यसबेला प्रमुख बालेन शाह भने काभ्रे जिल्लाको पाँचखाल पुगेका थिए । त्यस बखत उनी पाँचखाल केराबारी ३० किलोको एसएल अर्गानिक कफी एन्ड लस्सी सेन्टर पुगेर लस्सी पिउँदै थिए । कफी एन्ड लस्सी सेन्टरका सञ्चालक कविन्द्र तिमिल्सिनाले नागरिकलाई बताए अनुसार बालेन आफ्ना केही सहयोगीहरूका साथ बिहान त्यहाँ पुगेका थिए । उनले त्यहाँ लस्सी पिएर बाहिरिएका थिए ।
‘ठ्याक्कै घडी त हेरिएन तर, उहाँ बिहान १०–११ बजेतिर होला आउनु भएको थियो होला । लस्सी लिएर उहाँहरू जानु भयो,’ सञ्चालक तिमिल्सिनाले भने । ठीक त्यही बेला यता महानगर परिसरमा भने जनप्रतिनिधि र कर्मचारी र महानगर प्रहरीबीच धकेलाधकेल चल्दै थियो । बालेन बुधबार (हिजो) नै काभ्रेतर्फ लागेको बताइएको छ । उसो त उनले ठीक एक हप्ता अगाडि आफ्ना कर्मचारीले तलब खान नपाए सबैलाई ‘टुकुचामा गाड्ने’ चेतावनीपूर्ण स्टाटस फेसबुकमा लेखेका थिए । तर, एक हप्ता पुगेकै दिन उनी काभ्रेका लागि निस्किएका हुन् ।
