मुलुक विदेशीहरुको चक्रव्युहमा फस्यो : सीपी मैनाली
‘तत्कालै फेरि एउटा राजनीतिक परिवर्तनको आवश्यकता देखिएको छ’
![cp mainali](https://www.nayapage.com/wp-content/uploads/2024/06/cp-mainali.jpg)
काठमाडौं । नेकपा (माले) का महासचिव सीपी मैनालीले मुलुक विदेशीहरुको चक्रव्यूहमा फसेको बताएका छन् । दलहरुलाई प्रयोग गरेर नेपाललाई विदेशीहरुले आफ्नो नियन्त्रणमा लैजाने रणनीतिक लक्ष्य बनाएको महासचिव मैनालीले जिकिर गरेका छन् ।
पुष्पलाल अध्ययन समाजले शनिबार काठमाडौंमा आयोजना गरेको एक कार्यक्रममा बोल्दै उनले मुलुकलाई विदेशीहरुको नियन्त्रणबाट मुक्त गर्न नेपालका कम्युनिष्ट पार्टीहरुले आफ्नो विगतलाई समीक्षा गरेर अघि बढ्नुपर्नेमा जोड दिए । महासचिव मैनालीले मुलुकमा तत्काल जनवाद आउने सम्भावना नभए पनि कम्युनिष्टहरुले आफ्ना कमजोरी सुधार गर्दै अघि बढे समाजवाद निर्माणको आधार भने बताउन सक्ने उल्लेख गरे ।
उनले भने, ‘अब दलहरुलाई प्रयोग गरेर नेपाललाई विदेशीको नियन्त्रणमा लैजाने दोस्रो रणनीतिक लक्ष्यमा लागेको छ । यस्तो खालको कमजोरीहरु हाम्रोमा छन् । अहिले तत्कालै जनगणतन्त्र, तत्कालै समाजवाद आउने कुरा त म देख्दिन । तर अहिले तत्कालै एउटा फेरि एउटा राजनीतिक परिवर्तनको आवश्यकता देखिएको छ । त्यसका कार्यक्रमहरु, त्यसका लक्ष्यहरु, विधिहरु के हुन सक्लान ? अहिले मैले भन्न पाइन । अहिले मुलुक विदेशीहरुको चक्रव्यूहबाट मुक्त भएर स्वतन्त्र समाजको रुपमा अघि जानसक्छ । देशमा जनसत्ता आउन सक्ला र पूँजीवाद विरोधी समाजवाद निर्माण गर्ने परिस्थिति सिर्जना हुनसक्ला ।’ महासचिव मैनालीले नेपालमा अहिले पनि कम्युनिष्ट शक्तिहरुबीच एकता भइहाल्ने अवस्था नरहेको पनि जनाए ।