.gif)
.png)
हिजो मात्रै कोरोना पुष्टि भएका व्यक्तिको सेती प्रादेशिक अस्पतालमा मृत्यु
२०७७ चैत ३० सोमबार ११:१७ बजे
महेन्द्रनगर, ३० चैत । सेती प्रादेशिक अस्पतालमा उपचाररत एक जना कोरोना संक्रमितको सोमबार (बिहान) ज्यान गएको छ ।
कैलालीको गोदावरी नगरपालिका–३ का ५० वर्षीय पुरुष संक्रमितको मृत्यु भएको अस्पतालका सूचना अधिकारी दिलिप कुमार श्रेष्ठले जानकारी दिए । उनका अनुसार ती संक्रमितमा आइतबार मात्रै कोरोना पुष्टि भएको थियो ।
‘उहाँ हिजो संक्रमण पुष्टि भएपछि राति ८ बजे अस्पताल भर्ना हुनु भएको थियो । भेन्टिलेटरमा राखेर उपचार भइरहेको थियो’ सूचना अधिकारी श्रेष्ठले भने, ‘तर बचाउन सकिएन । शव व्यवस्थापनको लागि नेपाली सेनालाई खबर गरेका छौं ।’
उनका अनुसार मृतक संक्रमितमा कडा खाले निमोनिया देखिएको थियो । श्वासप्रश्वासमा जटिल समस्या देखिएपछि भेन्टिलेटरमा राखेर उपचार भइरहेको थियो । उनी फागुन पहिलो साता भारतबाट नेपाल फर्किएको खुलेको छ ।
