.gif)
 (1).png){kind=logo}
.png)
गौशालाका सुकुम्बासी बिचल्लीमा, निर्देशन पालना भएन
महोत्तरी, ७ चैत । महोत्तरी, गौशाला नगरपालिका– ५ स्थित निगौल गाई गौशालाको अतिक्रमित जग्गाबाट विस्थापित भई घरबारविहीन भएका अहिले जोखिमपूर्णरुपमा जीवन बिताउन बाध्य भएका छन् ।
भएको फुसको घर र कमाएर पैसाको जोहो गरी लाखौं रकम खर्चिएर निगौल गाई गौशालाको जग्गामा ठड्याएको पक्की घर डोजरले भत्काएपछि उनीहरुको वियोग भएको छ ।
गत फागुन १८ गते सङ्घीय सरकारका भूमि सुधार व्यवस्था तथा सहकारी एवं गरिबी निवारणमन्त्री पद्ममा आर्यालको उपस्थितिमा यहाँका ३२ वटा घरमाथि डोजर चलाएपछि उनीहरु अहिले खुला आकाशमुनि जीवन बिताउन बाध्य छन् ।
भत्काउनु पूर्व मन्त्री अर्यालले सम्बन्धित सरोकारवाला निकायलाई तत्काल बन्दोबस्त गर्न दिएको निर्देशन पालना भएको छैन । जसका कारण यहाँका पीडित विचल्लीमा परेका खुला आकाशमुनि दैनिकी गर्दै आएपछि दिनमा टन्टलापुर घामसँग सामना गर्नुपर्ने हुन्छन् भने रातिको समयमा शीतले भिज्नुपर्ने बाध्यता उनीहरुको रहेको छ ।
खुला आकाशमुनि दिन–रात बिताएपछि आफूलगायत बालबच्चा पछिल्लो समयमा बिरामीले ग्रसित हुन थालेको बताउँछिन्, स्थानीय ७२ वर्षीया चन्द्रकलादेवी साह । साहले भनिन्, ‘हातमा पैसा छैन । खानका लागि धौधौ परेको समयमा बालबच्चालाई उपचार गराउनका लागि रकम अभाव भएपछि रोग दबाएर बाँच्नुपर्ने अवस्था छ । के गर्ने सरकारी अस्पतालमा औषधि पाइँदैन । निजीका उपचार गराउने पैसा छैन ।’
दुई वटा छाप्रोको घरमा स परिवार जीवन बिताउने सोच बनाएकी ५४ वर्षीया सुजना हलुवाइको सपना सपनामै सीमित भइयो । उनी भन्छिन्, ‘सम्पत्तिको नाममा निगौल गाई गौशालाको जग्गामा बनाइएको फुसको दुई वटा घर थियो । त्यो पनि फागुन १८ गते डोजर लगाएर भत्काइयो । अब वियोग भयो ।’
त्यस्तै गौशालाकी ३२ वर्षीया शोभादेवी साहले आफ्नो गुनासो यसरी बताइन्, ‘आफ्ना परिवारका तीन पुस्ताले निगौल गाई गौशालालाई बचाउनका लागि खटेर जोगाएका छन् । अहिले आफूहरु विपत्को समयमा फर्केर कोही आएका छैनन् । गाईको गोबर स्याहारसुसार मात्र होइन कर्मचारीलाई खुशी पार्नका लागि रति भर कसर बाँकी राखेनौँ तर आज यो दिन देख्न परेको छ । यसभन्दा अपसोंचको कुरा के हुन सक्छ ।’
वर्षौंदेखि बजारको छेउमा चिया पसल सञ्चालनमा अवरोध भएको चन्दन साहको परिवार रातभरि नै खुला आकाशमुनि रात बिताउन बाध्य भएका छन् । पसलबाट हुने कमाइले सात जनाको परिवार पाल्दै आएका साहले अगाडि भने, ‘बुबालाई उपचार गराउने क्रममा गाउँमा भएको सारा सम्पत्ति बेचियो । अहिले सम्पूर्ण परिवार आकाशमुनि बस्न बाध्य छौँ, भरे के खाने होला भन्ने चिन्ताले सताएको छ ।’
निगौल गाई गौशालाको जग्गामा वर्षांैदेखि साइकल पसल गरी जसोतसो घर परिवार चलाउँदै आएका रुदल पासमानको गुनासो पनि अन्यको भन्दा फरक छैन । रुदल पनि पीडित हुन् । उनी पनि खुला आकाशमुनि दिन र रात बिताउन बाध्य भएका छन् । पासवानले दुखेसो पोख्दै अगाडि भने, ‘घरमा पाँच जनाको परिवार छ । बाबुको क्यान्सर बिरामी भएको समयमा आफ्नो नाममा भएको एक कठ्ठा घडेरी पनि बिक्री गरी जाँच गराए तर बुबालाई बचाउन सकेनाैं ।’
सार्वजानिक सम्पत्तिलाई कब्जा गर्नेको घर टहरा भत्काएर सरकारले प्रसंशनीय कार्य गरेको छ । अब यिनीहरुलाई पैसाको भरमा नियमविपरीत जग्गा उपलब्ध गराउनेलाई कानूनअनुसारको कारवाही प्रक्रिया बढाउनुपर्ने अत्यन्त आवश्यक रहेको स्थानीय रामनरेश रायले बताए ।
गौशाला नगरपालिकाको अतिक्रमित जग्गा गत वर्ष पनि यसरी नै भत्काएर वाहवाही कमाएपछि सो जग्गालाई संरक्षित गर्न नसकेको जानकारी गराउँँदै स्थानीय श्याम बछारले भने, ‘अब सो जग्गालाई सरकारले व्यवस्थित एवं संरक्षित गर्नका लागि समयमै ध्यान दिएर अगाडि बढाउनुपर्छ । अनि सरकारले गरेको कामको उपलब्धि एवं वास्तविक सफलता हासिल हुनेछ ।’
अब घरबारविहीन भएकालाई स्थानीय सरकारले तत्कालको गाँस, बास र आवश्यक दैनिकी व्यवस्थापन सहजका लागि कदम उठाउनुपर्ने आवश्यक रहेको बताउँछन्, गौशाला उद्योग वाणिज्य सङ्घका पूर्वसचिव सुनिलचन्द्र झा । झा अगाडि भन्छन्, ‘आयआर्जन गरिएको सारा सम्पत्ति लगाएर उनीहरु घर सजाउने सपना देखेका थिए । अपसोंच नेपाल सरकारले निर्णयले एकपलमै सखाप पारिदियो अब उनीहरु बेघर भएका छन् ।’
सरकारले सुुकुम्बासीको घरमा डोजर चलाएर मानहानिको काम गरेको समाजवादी पार्टीकी नेतृ रामकुमारी देवी महतो आरोप लगाइन् । महतोले भनिन्, ‘वर्तमान परिवेशमा आफूले व्यक्तिगतरुपमा रकम खर्चिएर उनीहरुको आँखाको आँशु पुछ्ने प्रयास गरेका छौं । यसमा सम्बन्धित निकायलाई ध्यान दिनु आवश्यक छ ।’
निगौल गाई गौशाला व्यवस्थापन कार्यालयका प्रमुख राधेश्याम खनालले भने, ‘कार्यालयले ३५ दिन अगाडि नै सम्बन्धित व्यक्तिका नाममा सार्वजनिक सूचना जारी गर्दै घरटहरा हटाउनका लागि आग्रह गरेका थिए तर उहाँहरु मान्नु भएन । सरकारले बाध्य भएर घरटहरामाथि डोजर चलाएर अतिक्रमित जग्गालाई आफ्नो मातहतमा ल्याउन सफल भएका छन् ।’
यस सम्बन्धमा गौशाला नगरपालिकाका उपप्रमुख आशा लामाले उनीहरुका लागि निगौल गाई गौशालाको बजारमा रहेको भवनमा सार्ने व्यवस्थापन गर्ने भनिए तापनि प्राविधिक कारणबस हुन नसकेको बताइन् । अबको केही दिनमा आवश्यक छलफल गरी पहलकदमी शुरु गरिने उपप्रमुख लामाले कुराकानीका क्रममा जानकारी दिइन् ।
निगौल गाई गौशाला व्यवस्थापन कार्यालयका प्रमुख खनालले कार्यालयले उपलब्ध गराएको सटरमा बास बस्नका लागि पीडित बास बस्न नमानेको प्रतिक्रिया दिनए । अब त्यहाँ रहेका तीन जना सुकुम्बासी पीडितलाई स्थायीरुपमा बसोबासको प्रबन्ध मिलाउनका लागि कार्यालय प्रक्रियामा लागिसकेको प्रमुख खनालले बताए ।
