अध्यक्ष ओलीलाई बाढीपीडितको सहयोगार्थ तीन लाख रकम हस्तान्तरण

प्रकाशित मिति :2017-09-13 17:02:10

भक्तपुर : नेकपा (एमाले)का अध्यक्ष केपी शर्मा ओलीलाई एमाले ललितपुर क्षेत्र नं ३ को राहत संकलन समितिका संयोजक रघुनाथ महर्जनसहितको टोलीले रु तीन लाख २५ हजार ७८० बुझाएको छ ।

ओली निवास बालकोटमा पुगेर टोलीले एमाले केन्द्रीय कार्यालयले सञ्चालन गरेको प्राकृतिक विपत्ति कोषको खातामा जम्मा गर्ने गरी बाढीपीडितका लागि सो रकम हस्तान्तरण गरेको हो ।

आफ्नै निवास बालकोटमा बुझ्दै ओलीले एउटा भूगोल र समुदायमा  विपद् पर्दा अर्को  भूगोलले सद्‌भाव देखाउने नेपालीहरूको परम्परागत संस्कार भएको  बताए । ‘नेपालीको यो आत्मीयताको सँस्कारलाई बिथोल्न थुप्रै व्यक्ति र संस्थाहरू लागि परे’ ओलीले भने ‘भुगोल,  जाती, धर्म आदिका नाममा नेपालीमा फाटो ल्याउन भएका सबै प्रयासलाई नेपाली जनताले निष्क्रिय पारेका छन् ।’पछिल्ला दुई दशक नेपालमा द्वन्द्व उद्योग गर्नेहरू धेरै फस्टाएको ओलीले बताए ।

नेपालको जातीय विविधता,भाषिक र सांस्कृतिक विविधतामा द्वन्द्वको बिउ रोपेर यसबाट छाक टार्नेहरूको बिगबिगी भएको ओलीले बताए । उनले भने,  ‘नेपाली समाजले द्वन्द्वलाई तिरस्कार गरेपछि त्यसको व्यवस्थापनका नाममा उद्योग गर्नेहरू पनि अहिले फस्टाएका छन् । यस्ता व्यक्ति वा संस्थाहरूबाट सजग हुनुपर्दछ ।’

केही तत्त्व अझै पनि  २ नम्बर प्रदेशमा द्वन्द्वको खेती गर्न सक्रिय भइरहेको ओलीको धारणा छ । ‘यी सबै तत्त्वलाई जनताले निर्वाचन मार्फत परास्त गरेर सहिष्णु समाज निर्माणको आधार तय गर्नेछन् ।’

राहत रकम सङ्कलन समितिका संयोजक रघुनाथ महर्जनका अनुसार उक्त रकम पार्टीका नेता, कार्यकर्ता, शुभचिन्तक र सहयोगीहरुबाट सङ्कलन गरिएको हो ।

राहत रकम नेकपा(एमाले) केन्द्रीय कार्यालयले सञ्चालन गरेको नेकपा एमाले प्राकृतिक विपत्ति कोषको  खातामा जम्मा गरेर तराईका बाढी पीडितलाई अविलम्ब पुर्याइने व्यवस्था गरिने ओलीले बताए।

    Comment Here!


©2016 | All rights reserved by Nayapage.com
Do not use or reproduce videos, photos and other materials without authorized permission

Designed By: Turup sangroula