दोक्लाम विवादपछि भेटेका सी र मोदीले भने,‘चीन र भारत सम्बन्ध स्थिर र स्वस्थ हुनुपर्छ’

प्रकाशित मिति :2017-09-05 16:59:58

सियामेन (चीन) : भुटानको सीमा दोक्लाममा चीन र भारतका सैनिकको उपस्थितिले उत्पन्न गराएको तनावपछि चिनियाँ राष्ट्रपति सी चिन फिङसँगको भेटवार्ता भएको छ । चीनको दक्षिणपूर्वी सहर स्यामनमा भएको भेटवार्ता पछि उनीहरुले भेटवार्ता फलदायी छलफल भएको प्रतिक्रिया दिएका छन ।

तस्विर :भारतीय प्रधानमन्त्री नरेन्द्र मोदीको टवीटबाट

चिनियाँ राष्ट्रपति सि चिनफिङ्ले चीन र भारत सम्बन्ध स्थिर र स्वस्थ हुनुपर्नेमा जोड दिएका छन् । चीन र भारतका नागरिकको चाहना पनि यस्तै रहेको भन्दै राष्ट्रपति चिनफिङ्ले यी दुई देशबीचको सम्बन्ध विश्वासमा आधारित र स्थिर हुनुपर्नेमा जोड दिएको समाचारमा जनाइएको छ । उक्त द्धिपक्षीय भेटवार्ताका क्रममा चिनियाँ राष्ट्रपति चिनफिङ्ले भारतीय प्रधानमन्त्री मोदीसँग सो धारणा राखेको सियामेनबाट प्राप्त समाचारमा जनाइएको छ ।

यस्तै प्रधानमन्त्री मोदीले मंगलबार टवीट गर्दे म्यानमार प्रस्थान गर्नु अघि मोदीले भारत र चीनको दुई पक्षीय हितमा फलदायी छलफल भएको प्रतिक्रिया दिएका छन । चीनको दक्षिणपूर्वी सहर सियामेनमा सम्पन्न ब्रिक्सको नवौँ सम्मेलनपछि चिनियाँ राष्ट्रपति चिनफिङ् र भारतीय प्रधानमन्त्री नरेन्द्र मोदीबीच भेटवार्ता भएको थियो ।

चीनले भारतसँग शान्तिपूर्ण सहअस्तित्वका साथै अरु विभिन्न पाँच सिद्धान्तका आधारमा सम्बन्ध बिकास गर्ने तथा साथ साथमा कामगर्न चाहेको पनि चिनियाँ राष्ट्रपति चिनफिङ्ले सो अवसरमा बताएका थिए । दुवै देशले आपसी एवम् पारस्परिक राजनीतिक विश्वासका आधारमा सम्बन्ध विकास गर्नुपर्नेमा उनको जोड थियो । यसले पारस्पारिक सहयोगमा अभिबृद्धि र आपसी हितको बिकास गर्नेमा उनले सो भेटका क्रममा जोड दिएको थियो । उनीहरुबीच द्धिपक्षीय वार्ता भएको थियो ।

ब्रिक्सको नवौँ सम्मेलन चिनियाँ दक्षिणपूर्वी सहर सियामेनमा सियामेन घोषणापत्र जारी गर्दै मङ्गलबार सम्पन्न भएको छ । तीन दिनसम्म सञ्चालन भएको सो सम्मेलनद्धारा जारी उक्त घोषणापत्रमा ब्रिक्स संगठनले विश्वमा पारदर्शीता एवम् खुलापनको विकास, समावेशीता र सबैको साझा चासोका विभिन्न एजेण्डाहरुको बिकासमा जोड दिएको राष्ट्रपति चिनफिङ्ले जानकारी दिए ।

चीन र भारतबीच अर्काे छिमेकी देश भुटानको समेत सिमाक्षेत्रमा पर्ने दोक्लाममा हालैमात्र आआफ्ना सैनिक उपस्थितिको विषयलाई लिएर विवाद उत्पन्न भएको थियो । त्यसयता यी दुई देशका नेताहरुबीच पहिलो पटक साक्षात्कार भएको छ । त्यसैले पनि यस भेटलाई विश्लेषकहरुले सम्बन्ध सुधारका लागि एक महत्वपूर्ण अवसरका रुपमा लिएका छन् ।

रासस÷ सिन्ह्वा÷एएफपी

    Comment Here!


©2016 | All rights reserved by Nayapage.com
Do not use or reproduce videos, photos and other materials without authorized permission

Designed By: Turup sangroula