अकुत सम्पत्ति आर्जनमा तानिएको शर्मा , बयान दिन नमानेपछि घरमै पुग्यो अख्तियार टोली


२३ कार्तिक २०७४, बिहीबार
chudamani sharma 1

काठमाडौं: कर छली प्रकरणमा मुद्दा खेपिरहेका कर आन्तरिक राजस्व विभागका निलम्बित महानिर्देशक चूडामणि शर्मामाथि अख्तियारले स्रोत नखुलेको अकुत सम्पत्ति आर्जन अभियोगमा अनुसन्धान अघि बढाएको छ।chudamani sharma 1

शर्माले अख्तियारमा पेस गरेको सम्पत्ति विवरणसहितको १३ पाने फाराम र अख्तियारले गरेको अनुसन्धानमा उनको २० करोड रुपैयाँभन्दा बढी स्रोत नखुलेको सम्पत्ति देखिएपछि उनीमाथि अनुसन्धान थालेको हो। अख्तियारले अनुसन्धानका शिलशिलामा बयानका लागि पटकपटक ताकेता गर्दा पनि अटेर गरेपछि बुधबार शर्माको घरमा सात दिने म्याद टाँस गरेको छ।

अख्तियारले वडा सचिवको रोहवरमा बुढानीलकण्ठ नगरपालिका–३ रुद्रश्वेर मार्गस्थित उनको घरमा सात दिनभित्र उपस्थित हुने सूचना टाँसेको हो।

म्याद टाँसका कारण निलम्बित सहसचिव शर्माले सात दिनभित्र अख्तियारमा उपस्थित भइसक्नु पर्छ। उपस्थित नभए अख्तियारले उनलाई पक्राउ गरेर कानुनी कारबाही अघि बढाउने जनाएको छ।

‘हामीले बयानका लागि शर्मालाई आयोगमा पटकपटक बोलायौं, तर आउनुको साटो उनले आलटाल गर्न खोजे, घरभित्रै बसेर कोही नभएको जवाफ दिन थाले, त्यसैले बाध्य भएर ७ दिने सूचना टाँस्नुपरेको हो,’ अख्तियार स्रोतले भन्यो, ‘अब पनि नआए पक्राउ गरेर ल्याइन्छ।’

शर्मामाथि कर निर्धारणमा अनियमितता गरेको आरोपमा झन्डै १० अर्ब रुपैयाँको बिगो र जरिवाना माग दाबीसहित दायर मुद्दा अझै विशेष अदालतमा विचाराधीन छ। उनी सर्वोच्च अदालतको आदेशबाट न्यायिक हिरासतबाट भने मुक्त भइसकेका छन्।अख्तियारका अनुसार आयोगमा शर्माले भरेको १३ पाने सम्पत्ति विवरण र अख्तियारको अनुसन्धानमा २० करोड रूपैयाँ सम्पत्तिको स्रोत खुल्न नसकेको देखिएपछि बयानका लागि ताकेता पनि गरेको थियो। आयोगले चार महिनाअघिबाट अकुत सम्पत्ति आर्जन गरेको विषयमा उनीमाथि अनुसन्धान थालेको थियो।

लोकसेवा आयोगको तयारी कक्षाको पारिश्रमिक र पुस्तक बिक्रीलाई आफ्नो आर्जन भएको भन्ने उनको दाबीलाई आयोगले मानेको छैन। यो खबर आजको राजधानीमा टपेन्द्र कार्कीले लेखेका छन्।

प्रतिक्रिया
  • प्रधान सम्पादक
  • राजेश राई
  • कार्यकारी सम्पादक
  • राजु शिवा
  • सूचना विभाग दर्ता नं.
  • १८०२/२०७६-७७