चितवनमा प्रचण्ड र विक्रम पाण्डेको रोचक भिडन्त
भरतपुर : पुष्पकमल दाहाल ‘प्रचण्ड’ प्रधानमन्त्री हुँदा विक्रम पाण्डे भूमिसुधार तथा व्यवस्थामन्त्री थिए। एउटै मन्त्रिमण्डलमा रहेर काम गरेका प्रचण्ड र पाण्डे अहिलेको निर्वाचनमा आमनेसामने छन्। प्रतिनिधिसभा सदस्यका लागि दाहाल र पाण्डेबीचको प्रतिस्पर्धा चर्चामा छ। अन्नपूर्ण पाेष्टमा खबर छ ।
दाहाललाई वन तथा भूसंरक्षणमन्त्री पाण्डेले चुनावी मैदानमा चुनौती दिएका छन्। राप्रपा (प्रजातान्त्रिक) का उपाध्यक्ष पाण्डे लोकतान्त्रिक गठबन्धनका उम्मेदवार हुन्। उनले पनि मतदातालाई आफ्नो पक्षमा पार्ने प्रयत्न थालिसकेका छन्।
प्रचण्डलाई जिताउन एमाले र पाण्डेलाई जिताउन कांग्रेस कार्यकर्ता लागिपरेका छन्। निर्वाचन प्रचारका लागि सामाजिक सञ्जालको प्रयोग बढी देखिएको छ। दाहालका लागि सबैभन्दा बढी चुनौती कांग्रेस कार्यकर्ता देखिएका छन्।
यसअघि कांग्रेससँग गठबन्धनको मत पाएर दाहालपुत्री रेणु दाहाल भरतपुर महानगरपालिकाको मेयरमा निर्वाचित भएकी थिइन्। मेयरमा जितेपछि वाम गठबन्धन गरेको भन्दै कांग्रेस कार्यकर्ता माओवादीसँग रुष्ट छन्। सोही क्षेत्रअन्तर्गत पर्ने माडीको बाँदरमुढे घटनाका कारण पनि माओवादीले आलोचनाको सामना गर्नुपरेको छ।
सशस्त्र द्वन्द्वकालमा माओवादीले सार्वजनिक बसमा बम प्रहार गर्दा ३९ जनाको ज्यान गएको थियो। उनले माडी पुगेर द्वन्द्वकालको सबैभन्दा ठूलो गल्ती भन्दै माफीसमेत मागे। आफूले निर्वाचन जिते विकासको लहर ल्याउने प्रतिबद्धता उनको थियो। माडीमा सुरुङ मार्ग र आकाशे पुलमध्ये एउटा बनाएर चितवन राष्ट्रिय निकुञ्जमा आवतजावत गर्न सहज बनाउने आश्वासन पनि बाँडे। ‘जित्न सकिने जिल्लाबाट निर्वाचन लड्न अनुरोध आएको थियो’, उनले भने, ‘यहाँका जनताको समस्या सम्बोधनका लागि नेतृत्व लिन चितवन आएको हुँ।’
पाण्डेले पनि चुनावी कार्यक्रमलाई तीव्र पारेका छन्। आफूले धोका नदिने भन्दै उनी कांग्रेस कार्यकर्ता लिएर चुनावी मैदानमा छन्। ‘म यो भूमि र यहाँका जनतासँग भिजेको छु’, उनले भने, ‘मलाई सबैले चिनेका छन्, विकास र जनताको माया नै मेरो जितको आधार हो।’ क्षेत्र नम्बर ३ मा एक लाख २५ हजार आठ सय २३ मतदाता छन्। दाहाल र पाण्डेसहित १४ जना उम्मेदवार छन्। यीमध्ये ६ जना स्वतन्त्र उम्मेदवार हुन्।
