ओली–प्रचण्ड बैठक : सिट बाँडफाँटमा सहमति, आइतबार एकता समितिको बैठक
काठमाडौं, ५ माघ : एमाले अध्यक्ष केपी ओली र माओवादी केन्द्रका अध्यक्ष पुष्पकमल दाहाल प्रचण्डले राष्ट्रियसभा सदस्य सिट बाँडफाँट टुंगो लगाएका छन् । कार्यदलले राष्ट्रियसभामा एमालेले २९ र माओवादी केन्द्रले १४ सिटमा उम्मेदवारी दिने टुंगो लगाएको थियो । दुई नेताबीच झण्डै ३ घन्टा छलफल भएको थियो ।
बालकोटस्थित ओली निवासमा भएको भेटवार्तामा दुई नेताबीच वाम कार्यदलले टुंगो लगाएको सिट बाँडफाँटलाई अन्तिम रुप दिने समझदारी भएको ओलीका प्रेस संयोजक चेतन अधिकारीले बताए ।
दुई घण्टा भएको छलफलमा ओली र प्रचण्डबीच प्रदेश सरकार गठन र पार्टी एकताका विषयमा पनि छलफल भएको छ । दुवै विषयलाई अन्तिम रुप दिन शनिबार पुनः दुई अध्यक्षबीच थप गृहकार्य हुने र आइतबार पार्टी एकता संयोजन समितिको बैठक बस्ने निर्णय भएको अधिकारीले जानकारी दिए ।
‘नेकपा (एमाले) का अध्यक्ष केपी शर्मा ओली र नेकपा माओवादी केन्द्रका अध्यक्ष पुष्पकमल दाहाल प्रचण्ड बीच आज मिति २०७४ माघ ५ गते ओली निवास बालकोटमा दिउसो १ देखि ४ बजेसम्म विभिन्न विषयमा छलफल भएको छ,’ उनले जारी गरेको प्रेस नोटमा भनिएको छ, ‘पहिलो,कार्यदलले राष्ट्रियसभा गठनका बिषयमा दिएको प्रतिवेदनमा व्यापक छलफल भएको र त्यसलाई आवश्यक परेमा सामान्य हेरफेर गरेर अन्तिम रुप दिने निर्णय भएको छ । दोस्रो, प्रदेश सरकार गठनका बिषयमा पनि दुई अध्यक्षबीच छलफल भएको छ । तेस्रो, पार्टी एकताका बिषयमा छलफल भएको छ ।’