प्रधानमन्त्री पोखरा जाने कार्यक्रम रद्द, फर्कियो हेलिकोप्टर
काठमाडौँ । प्रधानमन्त्री पुष्पकमल दाहाल ‘प्रचण्ड’ यति एयरको विमान दुर्घटनास्थल पोखरा जाने कार्यक्रम रद्द भएको छ । दुर्घटनास्थलको स्थलगत अवलोकन र उद्धार कार्यको अवलोकनका लागि प्रधानमन्त्री आइतबार पोखरा जाने कार्यक्रम रद्द भएको प्रधानमन्त्रीको निजी सचिवालयले जनाएको छ ।
‘भिआइपी जाँदा सुरक्षा जटिलता थपिने भएकाले सुरक्षा निकायको सुझावका आधारमा प्रधानमन्त्रीको पोखरा जाने कार्यक्रम रद्द गरिएको प्रधानमन्त्रीका निजी सचिव रमेश मल्लले जानकारी दिए ।
आइतबार बिहान यति एयरको विमानस्थल दुर्घटना भएपछि त्यसबारे थप बुझ्न प्रधानमन्त्री आफैं पोखरा जान लागेका थिए । गृहमन्त्री रवि लामिछाने र भौतिक पूर्वाधार तथा यातायतमन्त्री नारायणकाजी श्रेष्ठलाई लिएर पोखरा जाने प्रचण्डको कार्यक्रम बालुवाटारमा हेलिकोप्टर स्ट्यान्डबाइ रहेका बेला रद्द भएको हो ।
प्रधानमन्त्रीको सचिवालयले मन्त्रिपरिषद् बैठक सकिने बित्तिकै प्रधानमन्त्री प्रचण्ड पोखरा जाने जनाएको थियो । प्रधानमन्त्रीको सरकारी निवास बालुवाटारमा आइतवार आकस्मिक मन्त्रिपरिषद् बैठक बसेको थियो । त्यसले ५ सदस्यीय जाँचबुझ आयोग बनाएको छ भने भोलि शोक मनाउने निर्णय गरेको छ ।