ललितपुर महानगरपालिकाले किन्यो साढे ४ करोडमा दुई ब्रुमर
ललितपुर, २१ साउन । ललितपुर महानगरपालिकाले ४ करोड ४८ लाख ११ हजार दुई सय ८० रुपैयाँमा दुई वटा ब्रुमर खरिद गरेको छ ।
जेन टेक प्रालिमार्फत टेन्डर प्रक्रियाबाट ब्रुमर खरिद गरेको महानगरपालिकाले जनाएको छ । सडकमा रहेको धूलो सफा गर्न इटालीको ‘म्याकरो’ कम्पनीले निर्माण गरेको ‘एम ६०’ मोडलको ब्रुमर खरिद गरेको मेयर चिरिबाबु महर्जनले बताए ।
केही दिनमा औपचारिक कार्यक्रम गरी ब्रुमर सञ्चालन गर्ने तयारी रहेको महानगरका जिन्सी व्यवस्थापन शाखाका प्रमुख सागर थापाले बताए । उनले भने, ‘ब्रुमर सञ्चालनसम्बन्धी पाँच दिने तालिम हुँदै छ ।
तालिमपछि महानगरले निर्णय गरी ब्रुमर सञ्चालनको मिति तोक्नेछ ।’ ‘म्याकरो’ कम्पनीका इन्जिनियरले महानगरका मेकानिकल इन्जिनियर, चालक र मिस्त्री गरी पाँच जनालाई पाँच दिनसम्म दैनिक करिब तीन घण्टा तालिम दिनेछन् ।
पुरानो ब्रुमर चलाउन समस्या
महानगरपालिकासँग यसअघि एउटा ब्रुमर थियो । धुवाँ धेरै फाल्ने भएकाले प्रयोगमा ल्याउन नसकिएको महानगरका प्रवक्ता राजु महर्जनले बताए । पुरानो ब्रुमरले काम नगरेपछि महानगरले गत २७ मंसिरमा ब्रुमर खरिद गर्न टेन्डर आह्वान गरेको थियो ।
म्याप इन्टरप्राइजेज, टाइल ब्रदर, बल्र्ड वाइड ट्रेडिङ कम्पनी र जेन टेक प्रालि टेन्डर प्रक्रियामा सहभागी भएका थिए । जसमध्ये जेन टेक प्रालिले २७ पुस ०७५ मा ब्रुमर खरिद गर्ने जिम्मा पाएको थियो ।
ब्रुमरका विशेषता
दुवै ब्रुमर युरो ४ मापदण्डका छन् । ब्रुमरको इन्जिन क्षमता १ सय १० किलोवाट छ । बु्रमरले पिएम २.५ सम्मको धुलो छान्न सक्छ । अघिल्लो भागमा एउटा, ‘बडीको’ दायाँ बायाँ र मुनि एक–एक गरी ४ वटा ब्रस छन् ।
ब्रुमरमा ६ सय २० लिटर पानी र ६ घनमिटरको धुलो भण्डारण क्षमता छ । एक पटकमा अधिकतम ३.६ मिटर चौडाइसम्म सफाइ गर्ने महानगरका मेकानिकल इन्जिनियर पुष्कर भट्टराईले बताए ।
ब्रुमर स्मार्ट टिसीको महत्वपूर्ण आधार : मेयर
मेयर चिरिबाबु महर्जनले स्मार्ट सिटी बनाउने अभियानमा ब्रुमर खरिद महत्वपूर्ण आधार भएको बताएका छन् । उनले भनेका छन्, ‘हामी ललितपुरलाई स्मार्ट सिटी बनाउँछौँ । स्मार्ट सिटीका लागि चाहिने आवश्यक पक्षमध्ये यो पनि एक महत्वपूर्ण पक्ष हो ।
उपमेयर गीता सत्यालले महानगरपालिकाको शहरी क्षेत्रमा धुलो सफा गर्न ब्रुमर ऐतिहासिक हुने बताइन् । उनले भनिन्, ‘नगरका भित्री क्षेत्र सफा गर्न दुईवटा ब्रुमर पर्याप्त हुनेछन् ।’
यी रुटमा ब्रुमर चलाउने तयारी
शुरुवाती चरणमा कुपन्डोलदेखि लगनखेलसम्म ब्रुमरको प्रयोग गर्ने योजना रहेको महानगरले जनाएको छ । सडक पिच नभएका र मेलम्ची आयोजनाको काम हुँदै गरेका रुटमा तत्काल ब्रुमर प्रयोग नहुने भएको छ ।
रुटको सम्बन्धमा अन्तिम निर्णय भने नभएको प्रवक्ता महर्जनले बताए । ‘बिग्रिएको सडकमा ब्रुमर प्रयोग गर्दा ब्रुमर पनि बिग्रिने खतरा हुन्छ । त्यसप्रति हामी सचेत छौँ,’ उनले भने । नयाँ पत्रिका दैनिकबाट
